Էքսկլյուզիվ. Արթուր Չալիկյանը՝ անձնական կյանքի և հայրենիք վերադառնալ-չվերադառնալու մասին

Past.am-ը որոշել է գտնել սիրված հեռուստասերիալների «կորած» հերոսներին: Այս անգամ հերթը «Բանակում» և «Քաղաքում» հեռուստասերիալներում Ապավենին մարմնավորած Արթուր Չալիկյանինն է:

- Սիրված հեռուստասերիալից՝ «Բանակում»-ից սկսենք: Ինչքանով որ ես եմ հետևել, Ձեր կերպարը այդքան էլ դրական չէր: Ինչպե՞ս համաձայնեցիք այդ դերը խաղալ ու արդյոք սիրու՞մ էիք Ձեր կերպարը:

- Շատ դժվարությամբ համաձայնեցի խաղալ, որովհետև սովորում էի Թատերական ինստիտուտում` 4-րդ կուրսում և սկզբում նույիսկ չգիտեի` ինչ կերպար է: Բացի այդ, քանի որ ինստիտուտի ուսանող էինք, հնարավորությունը շատ մեծ էր սերիալում «փչացնելու» մեզ (մեր կուրսի ղեկավարը՝ Արմեն Էլբակյանը, խորհուրդ չէր տալիս, որ նկարահանվենք), բայց ստացվեց այնպես, որ համաձայնեցի ու նկարահանվեցի: Իսկ կերպարի լավ կամ վատ լինելու մասին ասեմ, որ բոլոր կերպարների մեջ էլ լավ բաներ էլ կան, վատ բաներ էլ, ու ինձ համար տարբերություն չկա` կերպարը դրակա՞ն է, թե՞ բացասական, կարևորը ճիշտ խաղալը և ճիշտ մատուցելն է: Չգիտեմ` ինչքանով է դա ստացվել, բայց ամեն դեպքում...

 - «Բանակում»-ից և «Քաղաքում»-ից հետո Ձեզ այլևս ոչ մի սերիալում չենք տեսնում: Արդյոք դա, ինչպես Դուք նշեցիք, կարող է ազդել Ձեր՝ լավ դերասան լինելու վրա՞, թե՞ այլ պատճառ կա:

- Մարդիկ նկարահանվում են սերիալում, ու միշտ նույն կերպարով, նույն դեմքով, նույն գույնով, նույն աչքերով, նույն ձայնով շարունակում են խաղալ, խաղալ և ամբողջ կյանքում մնում են նույն կերպարի մեջ՝ չկարողանալով դրանից դուրս գալ: Վտանգը մեծ է, երբ դու ուսանող ես ու շատ քիչ փորձ ունես, կարող ես ալիքի տակ ընկնել ու գնալ: Իսկ ինչ վերաբերում է այլ սերիալներում նկարահանվելուն, ասեմ, որ «Բանակում»-ից հետո գնացել եմ ծառայության, ծառայությունից հետո վերադարձել եմ, շարունակել ենք «Քաղաքում»-ը: Դրանից հետո մեկ այլ ֆիլմում եմ նկարահանվել, որը երևի եթեր չի հեռարձակվել:

- Ինչքանով ես եմ տեղյակ, այժմ գտնվում եք Ռուսաստանի Դաշնությունում: Ինչո՞վ եք զբաղվում ներկա պահին. Ձեր մասնագիտությա՞մբ եք զբաղվում, թե՞...

- Ներկա պահին՝ ամեն ինչով: Ե՛վ իմ մասնագիտությամբ և՛ ուրիշ գործերով: Բայց ասեմ, որ անկախ ամեն ինչից, միշտ աշխատելու եմ իմ մասնագիտությամբ: Հիմա գտնվում եմ Մոսկվայում, որտեղ կա Մոսկվայի հայկական թատրոն. հույսեր կան, որ մոտակա ժամանակահատվածում մասնագիտական նոր առաջընթաց Մոսկվայի հայկական թատրոնում կլինի:

- Կա՞ն նոր առաջարկներ այլ ֆիլմերում խաղալու վերաբերյալ:

- Առայժմ առաջարկներ չկան: Անկեղծ ասած՝ այստեղ մի քիչ դժվար է ֆիլմերի առումով:

- Անձնական կյանքի մասի՞ն ինչ կասեք: Կա՞ կամ եղե՞լ է ինչ-որ մեկը Ձեր կյանքում:

- Մի քիչ դժվար է պատասխանել այդ հարցին: Այսպես ասեմ. և՛ կա, և՛ չկա: Կա մեկը իմ կյանքում, որ միշտ կա... Կա ու կմնա իմ մեջ՝ այսօր, վաղը, հավերժ ...

- Արթուր Չալիկյանին սպասե՞նք հայրենիքում: Երկրպագուները հույս ունենա՞ն որ նորից կտեսնեն Ձեզ:

- Երկրպագուները՝ չգիտեմ, բայց հարազատներս թող անպայման հույս ունենան, որ կտեսնեն ինձ: Հայրենիք անպայման վերադառնալու եմ, որովհետև դա ճիշտ է: Հայը պետք է Հայաստանում լինի: 

Մարիամ Նալբանդյան