Գեներալ Պիեռ դե Վիլիեն ընդդեմ Մակրոնի

ՄԻՋԱԶԳԱՅԻՆ 22 Հուլիս, 2017 20:08

Հուլիսի 19–ին Ֆրանսիայի բանակի հրամանատար, գեներալ Պիեռ դե Վիլիեն հրաժարական է տվել իր պաշտոնից, ինչը միանշանակ պիտի սկանդալային համարել թեկուզ այն պատճառով, որ Ֆրանսիայի 5–րդ հանրապետության ողջ պատմության ընթացքում սա առաջին նախադեպն էր: Բացի այդ՝ նախագահ Էմանուել Մակրոնն ընդամենը հուլիսի 1–ին էր Վիլիենի լիազորությունները 1 տարով երկարացրել, և բնական է, որ այժմ բոլորն են հետաքրքրված նրա հրաժարականի պատճառներով: Պարզվում է՝ Պիեռ դե Վիլիեն այս քայլին է գնացել Մակրոնի հետ ունեցած տարաձայնությունների պատճառով և դեռ հուլիսի 12–ին՝ Ազգային անվտանգության խորհրդի պաշտպանության կոմիտեի փակ նիստի ժամանակ է այդ մասին հայտարարել: Անցած օրերի ընթացքում գեներալը մի քանի ճեպազրույցներում մեկնաբանել է, թե ոչ մեկին, այդ թվում՝ նախագահին, թույլ չի տա իրեն հիմարացնել, և, որ՝ ինքը չէր կարող հավանություն տալ բանակի օպտիմիզացիայի, ռազմական բյուջեն մոտ 1 միլիարդ դոլարի չափով կրճատելու՝ Մակրոնի ծրագրին, ինչը բանակին զրկում է Ֆրանսիան պաշտպանելու կայուն երաշխիքներից:

Ահա. խնդիրն, ուրեմն, բանակում կադրային կրճատումների և ռազմական բյուջեի սահմանափակման՝ Մակրոնի դիրքորոշումն է, ինչը գեներալը խաբեություն է որակել նախագահի նախընտրական խոստումների ու կառավարության ղեկավարի այն հայտարարությունների համատեքստում, թե՝ 2018–2025 թթ. Մակրոնը բանակին հատկացվող բյուջեն հասցնելու է երկրի ՀՆԱ–ի 2%–ին: Հանգամանք, ինչի առիթով վերջինս նաև ԱՄՆ նախաագահ Դոնալդ Թրանփի գովասանությանն էր արժանացել: Անշուշտ, որևէ մեկն այս հարցում չի կարող մեղադրել Վիլիենին: Ի վերջո, Ֆրանսիայում իրականացված ահաբեկչական գործողություններից հետո, վերջին 2–3 տարիների ընթացքում, երկրի քաղաքներում, ոստիկանական բաժանմունքներին զուգահեռ, տեղակայվել են շուրջ 10000 բանակայիններ։ Ֆրանսիական բանակի ստորաբաժանումները մասնակցում են Սիրիայում և Իրաքում ԴԱԻՇ ահաբեկչական խմբավորման դեմ իրականացվող ռազմական գործողություններին: Ֆրանսիայի զինված ուժերը՝ մոտ 4000 զինվորներով, խորհրդականներով ու հատուկջոկատայիններով, հակաահաբեկչական գործողություններ են իրականացնում Հյուսիսային Աֆրիկայում: ԱՄՆ նախագահ Դոնալդ Թրամփի պնդմամբ և թիվս այլ եվրոպական երկրների՝ Ֆրանսիան նույնպես համաձայնել է ՆԱՏՕ–ում ավելացնել իր ռազմական ներդրումը, իսկ եվրոպական միավորված բանակի ստեղծման անհրաժեշտությունը Գերմանիայի կանցլեր Անգելա Մերկելը ակտիվորեն է առաջ տանում: Արդյո՞ք, այս իրավիճակում խելամիտ որոշում էր՝ արհամարհել իրողությունները, սեփական նախընտրական խոստումներն ու կառավարության գործունեության ծրագիրը և հակադրվել փորձառու գեներալին՝ հայտարարելով, թե ոչ ոք չի կարող ընդդիմանալ նախագահին, որն այս թեմայով որևէ հանրային վիճաբանություն ու առերեսում չի հանդուրժի: Փաստ, որ փոխանցում է ֆրանսիական մամուլը՝ Մակրոնին կնքելով Նապոլեոն Մակրոն անվանմամբ:

Բայց, հավանաբար, Մակրոնին էլ է պետք հասկանալ. ի վերջո, նա հանրությանը խոստացել էր նաև նվազեցնել հարկերը, բազմաթիվ այլ բարեփոխումներ էր առաջ քաշել, որոնք պիտի ձևավորեին Ֆրանսիայի 6–րդ հանրապետության դեմքը, իսկ Եվրահանձնաժողովի առջև պարտավորվել էր Օլանդի տխուր ժառանգություն հանդիսացող բյուջետային դեֆիցիտը եռակի նվազեցնել՝ հասցնելով ՀՆԱ–ի 3%–ի մակարդակին: Բնական է, որ այս իրավիճակում շատ տրամաբանական հարց պիտի ծնվեր՝ իսկ որտեղի՞ց սկսել: Բանակից՝ համոզված է Մակրոնը, և այս որոշման արդյունավետությունն այժմ միայն ժամանակը ցույց կտա: Նշենք նաև, որ Ֆրանսիայի նախագահն արդեն իսկ զինված ուժերի նոր հրամանատար է առաջարկել գեներալ Ֆրանսուա Լաքուանթղին, որն 90–ականներին ծառայել է Բալկանների Սարաևոյում, իսկ Մալիում ղեկավարել է ԵՄ առաքելությունը, որտեղ նախագահի պաշտոնը ստանձնելուց հետո՝ Մակրոնն իր 1–ին այցը կատարեց: