Կառավարության ծրագիրը չի կատարվել. 900 աշակերտ ծվարել է դպրոցի մի մասում. «Ելք»

Թիվ 191 դպրոցի հիմնանորոգման ժամկետը վաղուց սպառվել է, բայց աշխատանքները չեն շարունակվում: Այս մասին հաղորդագրություն է տարածել Երեւանի ավագանու «Ելք» խմբակցությունը:

«Երեւանի Մալաթիա Սեբաստիա վարչական շրջանի թիվ 191 հիմնական դպրոցի հիմնանորոգումը «Կրթական օբյեկտների հիմնանորոգում» ծրագրով սկսվել է 29.01.2015թ., «Կանժիլստրոյ» ՍՊԸ-ի կողմից, հատկացվել է 321.621.0հազ. դրամ եւ 2016-2018թ.թ. ՀՀ կառավարության միջնաժամկետ ծրագրով նախատեսվել էր ավարտել 2016-ին: Արդեն 2017 թվականն է, սակայն դպրոցի վիճակը շատ տխուր է, որովհետեւ 2 տարի է հիմնանորոգումը դադարեցվել է, շինարարները կիսատ թողել գնացել են ու 2 տարի է չեն երեւում դպրոցում:

Կառավարության ծրագիրը չի կատարվել։ 900 աշակերտ ունեցող դպրոցը ծվարել է տարածքի կեսում եւ ստիպված որոշ դասարաններ 2-րդ հերթ են հաճախում։ Միեւնույն ժամանակ ՀՀ վարչապետը պահանջում է դպրոցներում վերացնել 2-րդ հերթը:

«Ելք» դաշինքի Երեւանի ավագանու անդամ Անահիտ Բախշյանը դիմել է քաղաքապետ Տարոն Մարգարյանին հետեւալ հարցադրումով՝ ինչու է հիմնանորոգումը կասեցվել, ինչու «Կանժիլստրոյ» ՍՊԸ-ի շինարարները չեն շարունակում այն:

Նա նաեւ խնդրել է պարզաբանել, թե ի՞նչ քայլեր են նախաձեռնելու դպրոցի հիմնանորոգման աշխատանքները մեկ օր առաջ ավարտելու եւ դպրոցի գործունեությունը բնականոն հունի մեջ դնելու համար»,-ասված է հաղորդագրության մեջ: