Մանրամասներ դանակահարված հոգեբան Ռուբեն Պողոսյանի վիճակից. արյան կորուստը հանգեցրել է կրկնակի ծանր ինֆարկտի զարգացմանը

Դանակահարված հայտնի հոգեբան Ռուբեն Պողոսյանի վիճակը գնահատվում է ծայրահեղ ծանր: «Արմենպրես»-ի հաղորդմամբ` Ռուբեն Պողոսյանը շտապ օգնության մեքենայով ծայրահեղ ծանր վիճակով տեղափոխվել է թիվ 1 համալսարանական հիվանդանոց:

Նա հիվանդանոց է տեղափոխվել դանակահարության հետևանքով ստացած գլխի և վերին վերջույթների բազմաթիվ վերքերով, առատ արյունահոսությամբ, ծանր աստիճանի հեմորագիկ շոկով: Անմիջապես տեղափոխվել է վիրահատարան, որտեղ դիմածնոտային, և այլ նեղ մասնագետները ցուցաբերել են համապատասխան բուժօգնություն: Վիճակը ծանրացել է մեծ արյան կորստի պատճառով, ինչը հանգեցրել է նաև կրկնակի ծանր ինֆարկտի զարգացմանը: Ներկա պահին վիճակը գնահատվում է կրիտիկական ծանր:
«ԱՅԳ» հոգեբանական ծառայությունների կենտրոնի ղեկավար, հոգեբան, Խ. Աբովյանի անվան հայկական պետական մանկավարժական համալսարանի դասախոս Ռուբեն Պողոսյանը հուլիսի 17-ին դանակահարվել է իր իսկ հոգեբանական կենտրոնում: ՀՀ ոստիկանության մամուլի  ծառայությունից մեզ հաղորդեցին, որ դեպքը տեղի է ունեցել  հուլիսի 17-ին: «Այդ օրը՝ ժամը 14.45-ին հիվանդանոցից ոստիկանության Կենտրոնականի բաժնում հաղորդում է ստացվել, որ «դեմքի կտրած վերք, բազմաթիվ վերքեր, արյունահոսություն» ախտորոշմամբ բուժօգնության է տեղափոխվել 1947 թ. ծնված Ռ. Պ.-ն:
Ոստիկանության ծառայողների ձեռնարկած միջոցառումների շնորհիվ պարզվել է, որ նույն օրը, ժամը 14.00-ին, Մաշտոցի պողոտայի 40 շենքում գործող հոգեբանական կենտրոնում 1983 թ. ծնված Հրանտ Հ.-ն թուղթ կտրելու դանակով հարվածներ է հասցրել Ռ.Պ.-ի դեմքին և գլխին՝ պատճառելով վնասվածքներ: Նշանակվել է դատաբժշկական փորձաքննություն: Կատարվում է քննություն»,-նշված է ոստիկանության հաղորդագրության մեջ: