Աբրահամ Խաշմանյան. Ոչ մի արդարացում չկա

Չեմպիոնների լիգայի որակավորման փուլի 2-րդ փուլի պատասխան խաղում «Ալաշկերտը» սեփական հարկի տակ 1:3 հաշվով պարտվեց ԲԱՏԷ-ին: Հանդիպումից հետո Հայաստանի չեմպիոնի գլխավոր մարզիչ Աբրահամ Խաշմանյանը պատասխանեց լրագրողների հարցերին:

 

 - Առաջին 20 րոպեն ու դրանից հետո թիմը տարբեր գործեց...:

 

 - Պարտությունից հետո արդարացում չի լինում, մեկ սխալը ճակատագրական է: Սխալ թույլ տվեցինք, մրցակիցը օգտվեց: Վատ ֆուտբոլ չենք խաղացել, առավելագույն նվիրում ցուցաբերեցինք: Դեռ այն մակարդակում չենք, որ սխալներ թույլ չտանք:

 

Չեմ կարծում, թե ֆիզիկապես վատ էինք նայվում: Առաջին գոլում գնդակը նվիրեցինք...: Մենք մի քանի ճակատագրական սխալ թույլ տվեցինք:

 

Այսպիսի բաներ լինում են: Մենք առաջին գոլի դրվագում կենտրոնում ազատ տարածություն ենք թողել: Նորից եմ ասում, ոչ մի արդարացում չկա: Ունեինք բացակայող և կիսատ պատրաստ ֆուտբոլիստներ: Իմ թիմն արեց առավելագույնը: Ունեինք պահեր. բնական է, չես օգտագործում, մրակիցն օգտվում է: 

 

 - Կոնկրետ պատճառը ո՞րն է, որ թիմը սկզբի լավ խաղը չպահեց:

 

 - Պետք է նայել նաև մրցակցի գործոնին: Նրանք ավելի որակյալ են: Մեր դարպասին 3 հարված է եղել և 3 գոլ:

 

 - Չեք կարծո՞ւմ, որ Բեգլարյանն անպատասխանատու գործեց:

 

 - Կարող եմ ասել, որ վատ խաղաց: Նա պրակտիկա ունի, հույս ենք դրել, մեկ խաղ սխալվեց, պարտվեցինք: 

 

 - Այս տարի նախորդի համեմատ թիմն աճե՞լ է:

 

 - Իհարկե: Ես գտնում եմ, որ աճել ենք: 

 

Այսպես կարող եմ ասել, առավելագույնն արել ենք: Մենք դուրս էինք եկել լավ խաղի համար: Շնորհակալ ենք երկրպագուներին: Այս մթնոլորտով կարող ենք ֆուտբոլ ունենալ:

 

 - Ինչպե՞ս եք ամփոփում թիմի ելույթը ՉԼ-ում:

 

 - Հստակ խնդիրն այն էր, որ առաջին փուլն անցնել: Ճիշտ է՝ մեծ էր ցանկությունը, որ 2-րդ փուլն անցնենք: Իրականությունն այն է, որ դեռ չենք կարող:

 

Խաղից հետո կարող ենք նստել, խոսել, բայց այդ պահին...:

 

 - Եթե նորից խաղայիք ԲԱՏԷ-ի հետ նույն մարտավարությունը կընտրեի՞ք:

 

 - Իհարկե:

 

 - Մրցավարի գործողություններից գո՞հ եք:

 

 - Ես դժգոհ եմ, օգնականից էլ եմ դժգոհ:

 

 - Ընդունած գոլից հետո ֆուտբոլիստները գլուխները բռնեցին և ընկան խոտածածկին. արդյո՞ք այդ պահից նրանց համար ավարտվեց խաղը:

 

 - Ոչ, պարզապես հասկացան, թե ինչ սխալ են գործել: