Սամվել Բաբայանը գործարքի չի գնացել իշխանությունների հետ. «Փաստ»

«Փաստ» օրաթերթը գրում է.

Մեր հյուրն է Հելսինկյան քաղաքացիական ասամբլեայի Վանաձորի գրասենյակի տնօրեն Արթուր Սաքունցը

– Պարոն Սաքունց, Սամվել Բաբայանին առաջադրված մեղադրանքները վստահություն ներշնչո՞ւմ են ձեզ:

– Ոչ:

– Ինչո՞ւ:

– Որովհետև Սամվել Բաբայանի նկատմամբ քրեական հետապնդումն իրականացվեց Ազգային Ժողովի 2017 թվականի ապրիլի 2–ի ընտրությունների նախընտրական քարոզչության ժամանակաընթացքում, երբ ակնհայտ դարձավ, որ նա աջակցում է ՕՐՕ դաշինքին:

Միաժամանակ հիշում ենք, որ նախընտրական քարոզչության ընթացքում, երբ ՕՐՕ դաշինքը Ջրառատ գյուղում հանդիպում էր անցկացնում բնակչության հետ, դաշինքի համակիրների նկատմամբ կիրառվեցին բռնություններ: Դրանք ուղեկցվեցին ապօրինի զենքի կիրառմամբ, նաև երկաթյա ձողեր օգտագործվեցին:

Այս ամենից հետո Սամվել Բաբայանը, ի պաշպանություն ՕՐՕ դաշինքի համախոհների, ըստ էության հակադարձեց բռնարարքների հեղինակներին և հայտարարեց, որ նման բռնություն իրականացնողները պետք է մտածեն, որ «կարող են տուն չհասնել»: Սա, ըստ էության, սպառնալիք էր, որ ուժի դեմ կարող են ուժ կիրառել:

Սրանից հետո, ահա, հարուցվում է նրա նկատմամբ քրեական գործ:

Այսինքն` Սամվել Բաբայանի նկատմամբ քրեական հետապնդումն իրականացվում է նախընտրական քարոզչության ամենաթեժ իրադարձությունների փուլում:

Նաև ի սկզբանե այնպիսի փաստեր են շարադրում ու դրանց հիման վրա հարուցում քրեական գործ, որոնք ժամանակի ընթացքում կրում են տարբեր փոփոխություններ:

Իմ կասկածները կայանում են այն բանում, կարող ենք ասել` դա համոզմունք է արդեն, որ վերևներում այսպես են մտածել` կարելի է քրական հետապնդում իրականացնել` Սամվել Բաբայանին վերցնել կալանքի տակ, պահել անազատության մեջ և դրանից հետո նոր միայն մտածել, թե ինչպիսի մեղադրանք առաջադրել նրա նկատմամբ: Ապա հավաքել փաստեր` մեղադրանքը հիմնավորելու համար:

– Շատերը կարծում էին, որ ընտրութուններից հետո Սամվել Բաբայանին ազատ կարձակեն: Որովհետև այլևս իշխանություններին վտանգ չի սպառնա: Բայց ընտրություններն անցան, ու նրան բաց չթողեցին: Ինչո՞ւ:

– Ես ևս ժամանակին նման կարծիք հայտնել եմ: Քանի որ այս քրեական հետապնդումն ապօրինի է և ունի քաղաքական նպատակ, այն է` զրկեն ՕՐՕ դաշինքին բավականին լուրջ ու ազդեցիկ աջակցողից, ամենայն հավանականությամբ բանակցություններ կընթանան իշխանությունների և Սամվել Բաբայանի միջև` վերջինիս հետագա վարքագծի ու պահվածքի վերաբերյալ: Որն էլ էական նշանակություն կունենա, թե արդյո՞ք նրա նկատմամբ եղած քրեական հետապնդումը կշարունակվի, թե` ոչ:

Հավանաբար այդ բանակցություններն արդյունք չեն տվել: Այսինքն` Սամվել Բաբայանը գործարքի չի գնացել և իմ համոզմամբ չի ենթարկվել իշխանության կողմից առաջարկված պայմաններին:

Ապրիլի ընտրություններից հետո, երբ ըստ էության հանրապետական կուսակցությունը խորհրդարանում ստացավ մեծամասնություն, իշխող ուժի մոտ ձևավորվեց վստահություն, որ իրենց դեմ խաղ չկա: Եվ փոխվեց այն զուսպ պահվածքը, որ ունեին մինչ ընտրությունները:

Ի դեպ, դա միայն Սամվել Բաբայանի դեմ հարուցված քրեական գործի առումով չէ, որ երևում է: Երևում է նաև Սասնա ծռերի, Գևորգ Սաֆարյանի, Ժիրայր Սեֆիլյանի նկատմամբ հարուցված քրեական գործերի շրջանակներում: Այսինքն` մարդկանց, ովքեր ունեն սկզբունքային դիրքորոշում իշխանությունների նկատմամբ: Եվ որոնց դեմ հարուցված քրեական գործերն ակնհայտաբար ունեն քաղաքական ենթատեքստ: Մարդիկ, ովքեր քաղաքական առևտրի գնալու հակումներ չունեն: Այս բոլոր մարդկանց նկատմամբ խստացվեցին քրեական մեղադրանքները:

Ասելս այն է, որ հանրապետական կուսակցության մարդիկ իրենց առավել անպարտելի, հետևաբար և` անպատժելի զգացին ընտրությունների արդյունքում: Հոգեբանական այդ փոփոխությունը, որ եղավ հանրապետական կուսակցության մեջ, նաև անձամբ նրանց ղեկավարի` Սերժ Սարգսյանի մոտ, դրսևորվում է նաև Վահան Շիրխանյանի նկատմամբ վերաբերմունքի մեջ:

Կամ դրա արտահայտություններից է նաև Սասնա ծռերի հետ կապված էպիզոդը, երբ վերջիններիս հենց դատարանում ենթարկեցին բռնությունների: Իսկ նման պահվածք և նման դեպքեր չեն եղել նախորդ ողջ ժամանակաշրջանում:

Փաստորեն ապրիլի 2–ի պյուրոսյան հաղթանակից ոգևորված, իրենց տոտալ իշխանությունը ձգտում են առավել ամրապնդել:

Շարունակությունը` «Փաստ» օրաթերթի այսօրվա համարում