Զոհված զինծառայողի ընտանիքի բնակարանի համար հատկացված գումարից մոտ 5 մլն դրամի հափշտակման գործը դատարանում է

Քաղաքացին զոհված զինծառայողի այրուն խաբելու և Պաշտպանության նախարարության կողմից բնակարան ձեռք բերելու համար տրամադրված գումարից 4 մլն 800 հզր դրամը հափշտակել է:

Tert.am-ը դատական տեղեկատվական համակարգից տեղեկացավ, որ գործն ուղարկվել է Շենգավիթ վարչական շրջանի ընդհանուր իրավասության առաջին ատյանի դատարան և մակագրվել դատավոր Վաչե Մարգարյանին:

Զավեն Զանյանին մեղադրանք է առաջադրվել այն բանի համար, որ նա, տեղյակ լինելով, որ իր ծանոթ, մահացած զինծառայող Հովսեփ Անտոնյանի ընտանիքը որպես անօթևան հաշվառված է բնակարան գնելու համար անհատույց պետական ֆինանսական աջակցություն ստանալու իրավունք ունեցողների ցուցակում, 2012թ-ին հանդիպել է Հովսեփ Անտոնյանի այրի Անահիտ Կարապետյանին և իր օգնությունն առաջարկել բնակարան գնելու համար նախատեսված գումարը ստանալու հարցում:

ՀՀ ՊՆ-ի կողմից 2012 թվականի ապրիլին Հովսեփ Անտոնյանի ընտանիքին երկու սենյականոց բնակարան գնելու համար 16 մլն 806 հզր ՀՀ դրամ գումար է հատկացվել: Անահիտ Կարապետյանի հաշվեհամարին գումարը փոխանցելուց հետո Զավեն Զանյանը նրան ներկայացրել է, թե իբր իր միջամտությամբ է կայացվել գումար հատկացնելու մասին որոշումը , ավելին՝ հասանելիք գումարից ավելի գումար է փոխանցվել, որը ենթակա է ետ վերադարձման:

Զանյանը Հովսեփ Անտոնյանի այրուն համոզել է կանխիկացնել ու իրեն տալ մեկ սենյականոց բնակարան գնելու համար նախատեսված 12 մլն ՀՀ դրամ գումարից ավել փոխանցված առանձնապես խոշոր չափի 4 մլն 800 հզր ՀՀ դրամ գումարը և խաբեությամբ հափշտակել այն:

Զանյանին մեղադրանք է առաջադրվել ՀՀ ՔՕ-ի 178-րդ հոդվածի 3-րդ մասի 1-ին կետի հատկանիշներով՝ խարդախությունը, որը կատարվել է առանձնապես խոշոր չափերով, հանցանքը պատժվում է ազատազրկմամբ՝ 4-8 տարի ժամկետով:

Զանյանը նախկինում դատված չէ, նրա նկատմամբ խափանման միջոց է ընտրվել կալանավորումը: