Դեռ վայելելու ենք ապստամբության բերկրանքը. Զարուհի Փոստանջյան

Եթե մեկ տարի առաջ ծրագրվածը հնարավոր չեղավ այդ օրերին իրականացնել, դա դեռ չի նշանակում, որ դա տեղի չի ունենալու եւ չենք վայելելու ապստամբության բերկրանքը։ Այս մասին այսօր՝ հուլիսի 17–ին, «Սասնա ծռեր» խմբի անդամների պաշտպանությամբ երթի ժամանակ հայտարարել է «Երկիր ծիրանի» կուսակցության առաջնորդ Զարուհի Փոստանջյանը։

«Մեկ տարի առաջ տրվել է մի գործողության մեկնարկ, որը պիտի բերեր ազատ եւ ինքնիշխան Հայաստանի, որը չունենք։ Հերոսների կողմից հարց բարձրացվեց, որ այս իշխանությունը նույնքան վտանգավոր է, որքան արտաքին թշնամին։ Հանրության շրջանում անկցկացված հարցումները ցույց տվեցին, որ հանրությունը կիսում է այդ գաղափարը, որ ապստամբության  դեպքում մենք կարող ենք ունենալ հաջողություն»,–ասել է Փոստանջյանը։

Զարուհի Փոստանջյանը մեկ անգամ եւս պնդել է, որ «Սասնա ծռերի» գործողությունները ապստամբություն էին, ոչ թե ահաբեկչություն։

«Ահաբեկչության հանցակազմ չկա, եւ, իհարկե, դրա մասին խոսելն անհիմն է։ Այն ապստամբություն է, որն իր մեջ հայտ ուներ բոլոր սոցիալական շերտերի։ Բացի այդ, մարդիկ, ովքեր նվիրյալ են եղել, մեր հայրենիքի համար ոչինչ չեն խնայել, իրենց անգին կյանքերը չեն խնայել, հետեւաբար խոսել, որ նրանք գնացել են հայկական պետականության դեմ, դա նույնպես անհիմն է։ Նրանք գնացել են հանուն պետականության, ազգային շահի եւ իրենց կյանքի գնով էին փորձում դա  անել։ Ուրիշ բան, որ այն ինչ ծրագրված էր, հնարավոր չի եղել ավարտել այդ օրերին, բայց դա չի նշանակում, որ դա տեղի չի ունենալու, եւ մենք չենք վայելելու ապստամբության բերկրանքը, չենք հիմնադրելու ազատ եւ անկախ պետականություն։ Նույն Ֆրանսիան ծնվել է ապստամբությունից, Բաստիլը քանդելուց»,–ասել է Զարուհի Փոստանջյանը։