Պուտինը ցավակցություն Է հայտնել Թբիլիսիում ջրհեղեղից տուժածներին

Ռուսաստանի նախագահ Վլադիմիր Պուտինը «ցավակցություն Է հայտնել բոլոր նրանց, ովքեր Վրաստանում տարերային աղետի հետեւանքով կորցրել են հարազատներին ու մերձավորներին»: Այդ մասին հունիսի 15-ին լրագրողներին հայտնել Է պետության ղեկավարի մամուլի քարտուղար Դմիտրի Պեսկովը, տեղեկացնում Է ՏԱՍՍ-ը:

Նրա խոսքով՝ Պուտինը նաեւ «զորակցություն Է հայտնել նրանց, ովքեր տուժել են, զրկվել օթեւանից»:

Պեսկովը հիշեցրել Է, որ «Ռուսաստանի արտակարգ իրավիճակներին նախարարությունն արդեն Վրաստանին օգնություն Է առաջարկել տարերային աղետի հետեւանքների վերացման համար:

Հունիսի 15-ին Վրաստանում Սգո օր է հայտարարված նախօրյակին ժամանակակից Թբիլիսիի պատմության ընթացքում ամենաուժեղ ջրհեղեղից զոհվածների հիշատակին: Հանրապետության ՆԳ նախարարության նախնական տվյալներով՝ տարերային աղետի հետեւանքով զոհվել է 12 մարդ, անհետ կորել է 24 բնակիչ:

Վրաստանի վարչապետ Իրակլի Ղարիբաշվիլին հայտնել է, որ «նախնական գնահատումների համաձայն՝ տարերքի պատճառած վնասը կազմել է շուրջ 50 մլն վրացական լարի (23 մլն դոլար)»:

Վրաստանի նախագահ Գեորգի Մարգվելաշվիլին հրամանագիր Է ստորագրել երկրի զինված ուժերը տեղատարափի եւ դրան հաջորդած ջրհեղեղի հետեւանքների վերացման համար օգտագործելու մասին:

Կարկուտով եւ քամիով  ուղեկցվող տեղատարափը Թբիլիսիում մոլեգնել Է լույս հունիսի 14-ի գիշերը: Դրա հետեւանքով վնասվել են բնակելի շենքեր, ճանապարհներ, ենթակառուցվածքի օբյեկտներ: Թբիլիսիի քաղաքագլուխ Դավիթ Նարմանիան հայտնել Է 12 զոհվածների մասին, սակայն վրացական ԶԼՄ-ները ժամ առ ժամ հայտնում են գտնված նոր զոհերի մասին: Ավելի քան 260 մարդ անօթեւան Է մնացել, 24 բնակիչ անհետ կորած Է համարվում: Ավերվել Է կենդանաբանական այգին, որտեղից փախել են 30-ից ավելի գիշատիչներ, այդ թվում՝ գայլեր, առյուծներ, արջեր, սատկել են 300-ից ավելի կենդանիներ: Տարերքի պատճառած վնասը գերազանցում Է 20 մլն դոլարը: