Վրաստանում անձնական գործածման նպատակով կանեփ ցանողներին այլեւս չեն ազատազրկի

Վրաստանի սահմանադրական դատարանը ոչ սահմանադրական է ճանաչել այն նորման, որի համաձայն անձնական գործածման նպատակով փոքր քանակության կանեփ ցանելը կամ աճեցնելը քրեորեն պատժելի հանցագործություն է համարվում, հայտնում է «Նովոստի Վրաստանը»։

Դատարանը որոշում է կայացրել Ջամբուլ Գվիանիձեի, Դավիթ Խոմերիկիի ու Լաշա Գագիշվիլու դիմումի հիման վրա։ Վրաստանի այդ քաղաքացիները հայց են ներկայացրել վրացական խորհրդարանի դեմ՝ պահանջելով ոչ սահմանադրական ճանաչել  Քրեական օրենսգրքի մի քանի նորմեր, որոնք վերաբերում են անձնական գործածման համար կանեփ աճեցնելուն։

Քաղաքացիները վիճարկում էին այն նորմերը, որոնց համաձայն 63․73 , 150․72 ու 265․49 գրամ կանեփ ցանելը, աճեցնելը պատժվում է ազատազրկմամբ։

Սահմանադրական դատարանը մասամբ է բավարարել հայցը։

Հայտարարության մեջ նշվում է, որ դատարանը առանձին  գնահատել է նշված չափաբաժիններն ու դրանց պոտենցիալ վտանգը։ Դատարանի վճռով՝ 63․ 73 ու 150․72 գրամ կանեփի դեպքում թմրանյութի իրացման վտանգ չկա, քանի որ կանեփի այդ քանակը կարող է կիրառվել միայն անձնական գործածման համար։

265․49 գրամ կանեփ ցանելու ու աճեցնելու համար քրեական պատիժը մնում է ուժի մեջ, քանի որ այդ դեպքում  կա թմրադեղերի վաճառքի սպառնալիք։

Հիմա այդ հանցագոծության համար նախատեսված է վեցից 12 տարի ազատազրկում։ Չնայած դատարանն այդ նորման ուժի մեջ է թողել, բայց նշել է, որ տվյալ պատժամիջոցը «ակնհայտորեն անհամաչափ է»։