«Ուրախ եմ, որ կարող եմ ցույց տալ, թե ինչպես են հայուհիները հասցնում իրենց տնային գործերը»․ Փեգի Սուլահյանը՝ ամերիկյան հանրահայտ շոուի մասնակից

Ամերիկյան հայտնի The Real Housewives of Orange Country ռեալիթի-շոուի նոր եթերաշրջանը համալրել է ազգությամբ հայ տնային տնտեսուհի Փեգի Սուլահյանը։

Decider.com կայքը զրուցել է հայուհու հետ՝ պարզելով, թե ինչպես է նա հայտնվել հանրհայտ հեռուստաշոուում։

Այսպիսով, Փեգին 3 երեխաների մայր է։ Նա մտերիմ է շոուի մեկ այլ մասնակից Լիդիա Մակլաֆլինի հետ։ Նրանք միմյանց հետ ծանոթացել են իրենց ամուսինների միջոցով։ Զույգերը հաճախ են միասին ժամադրությունների գնում եւ նշում ընտանեկան տոները։

Խոսելով շոուին միանալու մասին՝ Փեգին նշել է․

«Ամեն ինչ լինում է ճիշտ ժամանակին։ Կարծում եմ՝ պահը շատ ճիշտ էր, վայրը՝ հրաշալի ու ամեն ինչ ակամայից ստացվեց։ Ես ասացի ինքս ինձ, որ լավ կլինի փորձեմ դա։ Ես իսկական տնային տնտեսուհի եմ, շատ ժամանակ եմ տրամադրում երեխաներիս, միշտ վազքի մեջ եմ, միաժամանակ կարող եմ տասը գոծողություն կատարել։ Ես ուրախ եմ, որ հնարավորություն ունեմ ցույց տալու, թե ինչպիսին է իմ կյանքը եւ ինչպես են հայուհիները հասցնում կատարել տնային գործերը»։

Ինչպես ցանկացած շոուի դեպքում՝ մասնակիցները միմյանց հետ հաճախ են տարաձայնություններ ունենում․

«Այո, ես էլ բոլորի հետ խոսակցություններ ունենում եմ, կամ էլ նրանք են ամեն կերպ փորձում վիճաբանություն ունենալ ինձ հետ»,-կայքին տված հարցազրույցում նշել է հայուհին՝ հավելելով․

«Ես կարծում էի՝ իմ կյանքը դրամա է, բայց այդպես չէ։ Այն կարղ է շատ խենթ թվալ․ դու ինքդ կարող ես լավացնել կամ վատացնել քո կյանքը։ Իրականում ես շատ փակ մարդ եմ, ես իմ կյանքը հանրային չեմ դարձնում, այնպես որ՝ ինձ համար իսկապես անսովոր է նման նախագծի մասնակցելը»։

Շոուի ընթացքում Փեգին պատմել է նաեւ մոր մահվան մասին, որը կյանքից հեռացել է կրծքագեցձի քաղցկեղի պատճառով․

«Մի կարծեք, թե այն, ինչ դուք ունեք այսօր, կունենաք նաեւ վաղը։ Աշխարհում ամենից կարեւորն առողջությունն է։ Եթե առողջ ես, դա արդեն շքեղություն է։ Դա իսկական օրհնություն է։ Երբ դու չունես առողջություն, ոչ-ոք չի կարող քեզ դա տալ»,-նշել է նա։

The Real Housewives of Orange Country հեռուստաշոուն մեկնարկել է 2006 թ-ին։ Այն արդեն հեռարձակել է 11 եթերաշրջան։ Փեգի Սուլահյանին հեռուստադիտողը կտեսնի 12-րդ եթերաշրջանում։