Ընթացիկ տարում ՀՀ-ում արդեն իսկ մթերվել է 40 հազար տոննա բանջարեղեն

Հոկտեմբերի 16-ի դրությամբ գյուղատնտեսական մթերք վերամշակող ընկերությունների կողմից ՀՀ-ում մթերվել է շուրջ 40 հազ. տոննա բանջարեղեն, որը գերազանցում է նախորդ տարվա նույն ժամանակահատվածի ցուցանիշը  21.4 տոկոսով, իսկ պտղի մթերումների ծավալը կազմել է 17 հազար 500 տոննա, որն ավելի է նախորդ տարվա նույն ժամանակահատվածի ցուցանիշից 53.7 տոկոսով: Այդ մասին «Հայագրոֆորում» համաժողովի ժամանակ իր զկեւյցում նշեց ՀՀ գյուղատնտեսության նախարար Սերգո Կարապետյանը` ավելացնելով, որ պտուղ-բանջարեղենի մթերումները շարունակվում են:

Նրա խոսքով` գյուղատնտեսության զարգացման համար առանձնակի կարևորվում է գյուղա­տնտեսական մթերքներ վերամշակող արդյունաբերության զարգա­ցումը և այս բնագա­վառում ծառացած խնդիրների լուծումը: «Ներկայումս գյուղատնտեսական մթերքներ վերամշակող ոլորտին բաժին է ընկնում արդյունաբերության համախառն արտադրանքի 38.4 տոկոսը: Վերամշակման համակարգի գործունեության ակտիվացումը և արտա­դրության ծավալների աստիճանական ավելացումն որոշակիորեն նպաս­տել են գյուղատնտեսական արտադրանքի իրացման հիմնախնդրի մեղմմանը և գյուղացիական տնտեսությունների ապրանքայնության մակար­դակի բարձրաց­մանը: Սակայն, այս գործում, ինչպես գիտեք, առկա են որոշակի խնդիրներ»,- «Արմենպրես»-ի հաղորդմամբ` ասաց նախարարը:

Նրա խոսքով` իրենք պետք է հասնեն նրան, որ բոլոր գյուղատնտեսական հումք արտադրողների և վերամշակողների միջև նախօրոք հաստատվեն պայմանագրային հարաբերություններ, որը խնդրի լուծման հիմնական նախապայմաններից է: