Արցախում ընդունելության քննություններին մասնակցել է 663 դիմորդ, որը 200-ով պակաս նախորդ տարվանից. ԱՀ ԳԹԿ տնօրեն

Այս տարի Արցախում ընդունելության քննություններին մասնակցելու դիմում է ներկայացրել 663 դիմորդ, որն ավելի քան 200-ով պակաս է նախորդ տարվանից: Այս մասին Tert.am-ին հայտնեց Արցախի Հանրապետության ԿԳ նախարարության գնահատման և թեստավորման կենտրոնի տնօրեն Յուրի Քարամյանը:

Նախորդ տարի Արցախում դիմորդների թիվը եղել է 878: Դիմորդների թվի նվազման պատճառը, ԱՀ ԳԹԿ տնօրենի խոսքով՝ շրջանավարտների քիչ լինելն է: Նրա տեղեկացմամբ՝ նախորդ տարվա համեմատ այս տարի շրջանավարտ թիվը մոտ 300-ով պակաս է:

«Արցախից շատերը Երևան են գալիս իրենց ուսումը շարունակելու համար, բայց դիմորդների թվի նվազման պատճառը դա չէ, այլ շրջանավարտների թվի հետ է կապված: Տվյալները հստակ չունենք, բայց կարծում եմ՝ այս տարի Երևանում սովորել ցանկացողների թիվը շատ կլինի, որովհետև տնտեսագետներին և իրավաբաններին հիմնականում տեղ չենք կարողանում տրամադրել»,- նշեց նա:

Արցախում այս տարի դիմորդների 23 տոկոսը անբավարար են ստացել են, իսկ ամենից շատ անբավարար ստացողները եղել են ֆիզիկա առարկայից՝ 52 %-ը: Քարամյանի խոսքով՝ պատկեր ամեն տարի նույն է լինում թե անբավարարների թվի, թե գերազանց ստացողների մասով: Ըստ նրա՝ 23 % անբավարար գրանցվելու ցուցանիշը նորմալ է:

«Եթե հաշվի առնենք, որ 9-րդ դասարանից 62 տոկոսը ընդունվում են ավագ դպրոցներ, դա նորմալ թիվ է: Եթե ընդունվեր 30-40 տոկոսը, ոնց որ հիմնականում պետք է լինի, որպեսզի միջին մասնագիտականն ու արհեստագործականն էլ 30-40 տոկոս ընդունվեին, դա արդեն մտահոգիչ ցուցանիշ կլիներ»,- ասաց Քարամյանը:

Արցախում ընդունելության քննությունների վերջնական արդյունքները՝ վճարովի, անվճար, արտոնյալ պայմաններով ընդունվածների թիվը, հայտնի կլինի հուլիսի 15-ին՝ ցուցակների հրապարակումից հետո: