ARMENPRESS.AM - «Արմենիա» միջազգային մրցույթ-փառատոնի փակմանը հանդես կգա Գրեմմիի կրկնակի մրցանակակիր Մաքսիմ Վենգերովը

: «Արմենիա» միջազգային մրցույթ-փառատոնի փակման համերգին Հայաստանի պետական երիտասարդական նվագախմբի հետ ելույթ կունենա Գրեմմիի մրցանակի կրկնակի դափնեկիր ջութակահար Մաքսիմ Վենգերովը: Նույն օրը՝ հուլիսի 12-ին հայտնի կդառնան հաղթողների անունները: «Արմենպրես»-ի հաղորդմամբ՝ հուլիսի 11-ին կայացած ասուլիսում Վենգերովը նշեց, որ փառատոնն ինքնատիպ է և մեծ հարթակ է երիտասարդ երաժիշտների համար՝ ներկայացնելու իրենց արվեստը:

«Այս փառատոնն առավել քան կարևոր է մեզ համար: Մեզ հաջողվեց կազմակերպել այն այս տարի, որի համար շնորհակալ ենք բոլոր այն մարդկանց, ովքեր օգնեցին: Այն, որ մենք ունենք 46 մասնակից, այն, որ Մաքսիմ Վենգերովն այսօր այստեղ է, մեծ հաղթանակ է մեզ համար:  Հայաստանում մրցույթ է կազմակերպվել, և մարդիկ եկել են՝ հավատալով, որ իրենց ներկայացնելու համար կա հարթակ»,-ասաց մրցույթ-փառատոնի գեղարվեստական ղեկավար Սերգեյ Սմբատյանը:

«Ինձ համար պատիվ է լինելու այս արևոտ, մշակութային երկրում, ուրախ եմ շփվելու նման երաժիշտների հետ: Նախորդ անգամ, երբ հանդիպեցի Սերգեյ Սմբատյանին, նա շատ գաղափարներ ուներ, և ես վստահ էի, որ ամեն ինչ կստացվի: Ահա և արդյունքը՝ փառատոնը: Փառատոնը շատ կարևոր հարթակ է երիտասարդների համար: Հայաստանի մասին ես լսել եմ շատ աղբյուրներից և ուրախ եմ, որ այսօր այստեղ եմ ու մասնակցում եմ հենց առաջին փառատոնին»,-ասաց Մաքսիմ Վենգերովը:

Նրա խոսքով՝ յուրաքանչյուր փառատոն հարթակ է երաժիշտի համար՝ կիսվելու իր արվեստով և համագործակցելու մյուսների հետ, ինչը շատ կարևոր է:  «Այս փառատոնն եզակի է: Եվ, կարծում եմ, կբացի նոր հորիզոններ»,-ասաց Վենգերովն ու նշեց, որ հուլիսի 12-ին կայանալիք համերգին Սերգեյ Սմբատյանի հետ կկատարեն Բրամսի ստեղծագործություններից մեկը, որը ջութակի արվեստի գագաթնակետն է: