«Պետք է լինեն շատ կոնկրետ ու հստակ գործողություններ՝ Ադրբեջանի ռազմական ավանտյուրան կանխելու համար». Կորյուն Նահապետյան

Հուլիսի 4-ից մինչ օրս արցախա-ադրբեջանական հակամարտ զորքերի շփման գծում իրադրության սրման առնչությամբ Past.am-ը զրուցել է ՀՀ ԱԺ ՀՀԿ խմբակցության պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանի հետ.

 

- Պարո՛ն Նահապետյան, հուլիսի 4-ին արցախա-ադրբեջանական սահմանագծին տեղի ունեցած զարգացումների հետ կապված հայտարարությամբ հանդես եկան ԵԱՀԿ Մինսկի խմբի համանախագահները, ինչպես նաեւ փաստացի կոնֆլիկտներ հրահրող Ադրբեջանին զենք մատակարարող ՌԴ-ն: Ինչպե՞ս ընկալենք այս երկու լղոզված ու անհասցե արձագանքները:

 

- Կարծում եմ՝ միջազգային հանրության կողմից Ադրբեջանի ռազմական արկածախնդրությունն ուղղակիորեն դատապարտող հայտարարություններն ու դրանցից բխող գործողությունները պահանջված են հենց իր իսկ միջազգային հանրության շահերով՝ թույլ չտալու հակամարտության օջախի թեժացում տարածաշրջանում:

 

Անշուշտ, եթե ներդրված լիներ միջադեպերի հետաքննության միջազգային մեխանիզմ, որին դեմ է Ադրբեջանը, ապա կարձանագրվեր, որ հենց Ադրբեջանի ղեկավարությունն է շփման գծում տեղի ունեցածի պատասխանատուն:

 

Ձեր հիշատակած արձագանքներում կողմերին ռազմական գործողությունները դադարեցնելու և շփման գծում իրադրության կայունացման կոչեր են արվում:

Զսպվածության կոչերի հետ մեկտեղ պետք էր արձանագրել, թե որ կողմն է նախահարձակ եղել, որ կողմն է իր զինված ուժերը տեղակայել քաղաքացիական բնակչության մոտակա բնակավայրերում, և հենց այդ վայրերից կրակ արձակել՝ դրանով իսկ թիրախ դարձնելով իր քաղաքացիներին:

 

Այդպիսի արձագանքի բացակայությունը Ադրբեջանի ռազմաքաղաքական ղեկավարության մոտ առաջացնում է անպատժելիության զգացում և նոր արկածախնդրության դիմելու մղում:

 

Արցախա-ադրբեջանական սահմանագծում իրադրության սրման առնչությամբ միջազգային կազմակերպությունների և պետությունների անհասցե կոչերը, Ադրբեջանի նկատմամբ պատժիչ գործողությունների բացակայությունը, ավելի սանձարձակ են դարձնում Ադրբեջանի ղեկավարությանը:

 

Հիշում եք, վերջին ժամանակաշրջանում տեղի ունեցավ դեպք, երբ ԵԱՀԿ Մինսկի խմբի համանախագահները հասցեական գնահատական տվեցին Ադրբեջանի ռազմական գործողություններին՝ շեշտելով, որ հենց Ադրբեջանն է եղել նախահարձակ: Շատ կարեւոր է, որ նման հետեւողականություն լինի բոլոր դեպքերում:

 

Բազմիցս ենք փաստել, որ Ադրբեջանի զինված ուժերը թաքնվում են քաղաքացիական բնակչության թիկունքում եւ այնտեղից տարբեր տրամաչափի զենքերով կրակում Արցախի ՊԲ-ի առաջապահ դիրքերի ուղղությամբ: Այդ պարագայում բնական է, որ պետք է լինեն պատասխան գործողութուններ, եւ պաշտպանական բանակը դիմում է հենց այդպիսի գործողությունների՝ պատժելով և զսպելով հակառակորդին:

 

- Արդյոք հասցեական հայտարարությունները զսպաշապիկ կլինե՞ն Ադրբեջանի համար:

 

- Այո, միջազգային հանրության հասցեական, հստակ և հավասարակշռված, հայտարարություններն ունեն զսպող նշանակութուն, սակայն, կարծում եմ՝ վաղուց եկել է ժամանակը սպասել նաև նրանից կանխարգելիչ և պատժիչ գործողություններ:

 

Միջազգային կազմակերպությունների, ԵԱՀԿ Մինսկի խմբի համանախագահների կողմից պետք է իրականացվեն կոնկրետ ու հստակ գործողություններ՝ Ադրբեջանի ռազմական ավանտյուրան կանխելու համար:

 

Դատապարտող հայտարարություններն անհրաժեշտ են, բայց բավարար չեն, պետք է համապատասխան սանկցիաներ կիրառվեն Ադրբեջանի իշխանությունների նկատմամբ, որպեսզի վերջիններս գիտակցեն, որ ռազմական ճանապարհով հակամարտության կարգավորումն անհնար է:

 

Եթե միջազգային հանրության համար Հարավային Կովկասում կայունութունն ու անվտանգությունը ունեն կարեւոր նշանակություն, ապա Ադրբեջանի ղեկավարության՝ տարածաշրջանը ապակայունացնող քայլերը պետք է միանշանակ դատապարտվեն, ու այդ դատապարտումից բխող համարժեք գործողություններ իրականացվեն:

 

- Փաստացի, ադրբեջանական ռազմաքաղաքական վերջին քայլը՝ բնակելի տարածքներին մոտ զինուժի տեղակայումը, միջազգային նորմերի կոպիտ խախտում էր:

 

- Ճիշտ եք, խաղաղ բնակչության շրջանում զինուժի եւ սպառազինության տեղակայումը միջազգային մարդասիրական իրավունքի խախտում է: Այս առումով մտահոգություն է հնչել նաեւ ԵԱՀԿ Մինսկի խմբի համանախագահների անունից՝ ներկայացվել է պահանջ վտանգի տակ չդնել քաղաքացիական անձանց, իսկ այս դեպքում հենց Ադրբեջանն է վտանգել իր քաղաքացիական բնակչության անվտանգությունը։

 

- Միջազգային ի՞նչ նորմերով կարելի է պատասխանատվության ենթարկել Ադրբեջանին:

 

- Ադրբեջանը խախտել է Ժնևյան կոնվենցիայով ամրագրված պարտավորությունները, և հենց այդ շրջանակում էլ ենթակա է պատասխանատվության:

 

 

 

Սոսե Չանդոյան

 

Կիսվել