Իշխանությունը մի օր դաժան ձևով կզգա ընդդիմության շունչը. Սասուն Միքայելյան

Իշխանությունը մի օր դաժան ձեւով կզգա ընդդիմության շունչը։ «Ելք» դաշինքի պատգամավոր Սասուն Միքայելյանը NEWS.am–ի հետ զրույցում այսպես հակադարձեց ՀՀԿ խմբակցության ղեկավար Վահրամ Բաղդասարյանի այն խոսքերին, թե իշխանությունն իր թիկունքում չի զգում ընդդիմության շունչը։ ՀՀԿ խմբակցության ղեկավարը այս մասին հայտարարել էր NEWS.am–ի հետ զրույցում։

«Մի օր կզգա, շատ դաժան ձեւով կզգա ընդդիմության շունչը, ժամանակը ցույց կտա, թող սպասեն»,–ասաց ընդդիմադիր պատգամավորը՝ նշելով, որ իշխանությանն էլ հայտնի չէ՝ 2018–ից հետո քաղաքական գործընթացներն ինչ ուղով կզարգանան եւ ով կլինի իշխանության ղեկին։

Սասուն Միքայելյանը  չի բացառում, որ 2018 թվականից հետո երկրում այնպիսի զարգացումներ կարող են տեղի ունենալ, որի արդյունքում Սերժ Սարգսյան չդառնա վարչապետ։

«Պահի տակ կարող ա նենց բան լինի։ Ես որ ուսումնասիրել եմ հեղափոխությունները բոլոր ժամանակների, տեսել եմ, որ հենց սուտի թաղային վիճաբանությունից սկսվել է ամեն ինչից։ Եթե էս իրավիճակը չկարգավորվի, լավ բանի թող չսպասեն։ Իրավիճակից դուրս գալու հարցն է էստեղ, էս իշխանությունը իր առաջնորդով հանդերձ չկարողացավ պահել պետություն, ընդամենը իշխանություն են պահում, ուրիշ ոչինչ։ Իսկ պետություն պետականություն,պատերազմ, ժողովուրդ, արտագաղթը անտեսել են»,–ասաց Սասուն Միքայելյանը։