ՀՀ-ում տեղադրված է 125 տեսանկարահանող սարք և 177 արագաչափ. դրանց շահագործումից հետո ՃՏՊ-ների թիվն աճել է

2017 թվականի հունիսի 27-ի դրությամբ տեսանկարահանող սարքերի միջոցով վերահսկվում է Երևան քաղաքի 121 խաչմերուկի և 4 փողոցի առանձին հատվածների երթևեկությունը, իսկ հանրապետական և համայնքային նշանակության ավտոմոբիլային ճանապարհներին շահագործվում  է 177 լուսանկարահանող-արագաչափ սարք, որից 92-ը՝ Երևան քաղաքում:

Լուսանկարահանող և տեսանկարահանող սարքերի շահագործումը սկսվել է 2012 թվականից: Մինչև սարքերի տեղադրումը՝ 2011թ-ին 2319 ճանապարհատրանսպորտային պատահար է տեղի ունեցել, իսկ 2012, 2013, 2014, 2015 և 2016 թթ. համապատասխանաբար՝ 2602, 2824, 3156, 3399 և 3203 ՃՏՊ:

Այս մասին Tert.am-ի հարցմանն ի պատասխան հայտնեցին ՀՀ ոստիկանության հասարակայնության հետ կապի և լրատվության վարչությունից:

Չնայած ճանապարհատրանսպորտային պատահարների աճին, դրանց հետևանքով զոհերի թիվը ոչ թե աճել է, այլ՝ նվազել: Եթե 2011թ-ին՝ մինչ արագաչափերի և տեսախցիկների շահագործումը, ՃՏՊ-ների հետևանքով զոհվել էր 327 մարդ, ապա դրանից հետո՝ 2012թ եղել է 311 զոհ, 2013թ-ին` 316, 2014թ-ին՝ 297 և 2016թ-ին՝ 267 զոհ: Միայն 2015թ-ին է, որ ՃՏՊ-ի հետևանքով ավելի շատ՝ 346 զոհ է եղել, քան 2011թ-ին:

Զոհերի կրճատման մասին առավել ամբողջական պատկեր ստանալու համար նշենք, որ 2012 թվականի հունվարի 16-ից լուսանկարահանող-արագաչափ սարքերը կիրառվել են հիմնականում Երևան քաղաքում, և նախքան կիրառումը առկա էր զոհերով և վիրավորներով ՃՏՊ-ների հետևյալ վիճակագրությունը՝ 2009թ-ին՝  72 զոհ, 2010թ-ին՝  81, 2011թ-ին՝  92, 2012թ-ին՝ սարքերի գործարկումից հետո՝  63 զոհ: 

Ինչ վերաբերում է ՃՏՊ-ների հետևանքով վիրավորումներին, ապա դրանք նույնպես տարեց-տարի  աճ են գրանցել: 2011թ-ին վիրավորվել է 3354 մարդ, իսկ արդեն 2016թ-ին՝ 4451: