Տաջիկստանը Հայաստանից ակնկալում է ոսկեգործության մասնագետների վերապատրաստում

Ոսկերչական ոլորտում Հայաստանի և Տաջիկստանի համագործակցության արդյունքում տաջիկները հայկական կողմին կարող են առաջարկել մեծ ծավալներով ոսկերչական իրեր և ոսկու հումք: «Արմենպրես»-ի հաղորդմամբ` այս մասին հուլիսի 7-ին լրագրողների հետ զրույցում ասաց «Տաջիկական հազվագյուտ մետաղներ» պետական ունիտար ձեռնարկության գլխավոր տնօրեն Կոմիլի Կամոլջոնին: Նրա խոսքով` Տաջիկստանը կարող է Հայաստանին առաջարկել ներկրել աֆինաժային ոսկի:

«Փոխարենը` հայկական կողմը ոսկերչական քարերի վերամշակման ոլորտում շատ զարգացած է, իսկ մենք` շատ թույլ և ցանկանում ենք, որ մեր մասնագետները Հայաստանում անցնեն դասընթացներ և ձեր վարպետներն իրենց փորձը ցույց տան, որպեսզի մեր  կազմակերպություններն էլ նման հնարավորություններ ունենան: Սա նվազագույնն է, որ կարելի է անել ոսկեգործության ոլորտում»,- ասաց նա` ընդգծելով, որ Հայաստանի և Տաջիկստանի միջև առաջին համագործակցությունըծավալվել է անցած տարվա հոկտեմբերին` ՀՀ տնտեսական զարգացման և ներդրումների ու Տաջիկստանի արդյունաբերության և նոր տեխնոլոգիաների նախարարությունների միջև, ինչը հայաստանցի և տաջիկ արդյունաբերողների համար դարձավ շարժիչ գործոն:

Նրա խոսքով` մոտ երկու շաբաթ առաջ կողմերը բազմաթիվ համաձայնագրեր են կնքել, որոնցից մեկն էլ տոլինգի վերաբերյալ է եղել: Կամոլջոնին տեղեկացրեց, որ այդ համաձայնությունը հաստատվել է, սակայն դրա իրականացման ժամկետներից ինքը տեղեկացված չէ: Նրա կարծիքով` ոչ մի փաստաթուղթ սեղանին չի մնա, դրանք կյանքի կկոչվեն, որի համար, որպես ապացույց, մատնանշում է վերջին 5 ամիսների ընթացքում 3 անգամ Հայաստան գալը և գործնական քայլերի փուլ դուրս գալը: