Համբուրգում ցուցարարները «մոլոտովյան կոկտեյլներ» են նետել ոստիկանների վրա

Գերմանական Համբուրգ քաղաքում, որտեղ այս օրերին անցկացվում է «Մեծ քսանյակի» գագաթնաժողովը, ցուցարարները «մոլոտովյան կոկտեյլներ»՝ կրակային պայթուցիկներ են նետել ոստիկանների վրա: Այս մասին ասվում է Համբուրգի ոստիկանության Twitter-ում:

«Հոլսենշտրասե փողոցի վրա մեր գործընկերների վրա «մոլոտովյան կոկտեյլներ» են նետվել և բարիկադներ են վառվում», - ասվում է ոստիկանության էջում:

Ինչպես РИА Новости-ին հայտնել է իրավապահ մարմինների աղբյուրը, ամբողջ քաղաքում անցկացվում են չարտոնված ակցիաներ:

Աղբյուրի հաղորդմամբ՝ ցւոցարարների հետ բախումների արդյունքում վնասվածքներ ստացած ոստիկանների թիվը հասել է 159-ի, ձերբակալվել է 45 իրավախախտ:

Ակտիվիստներն իրենց հերթին մեղադրում են ոստիկաններին իշխանությունը չարաշահելու համար՝ հայտնելով, որ ոստիկանների արձագանքն անհամաչափ է սպառնալիքին, իսկ ջրցանների և արցունքաբեր գազի կիրառումը ցուցարարների դեմ անընդունելի է:

Հիշեցնենք, որ Համբուրգում մեկնարկել է «Մեծ քսանյակի» գագաթնաժողովը, որի ֆոնին բողոքի ցույցերը Համբուրգում ստեղծել են քաոսային իրավիճակ. ցուցարարներն արգելափակել են գագաթնաժողովի հանդիպման վայր տանող փողոցները: ԱՄՆ առաջին տիկին Մելանյա Թրամփը, մասնավորապես, չի կարողացել ցուցարարների պատճառով դուրս գալ հյուրանոցից՝ առաջնորդների կողակիցների համար կազմակերպված միջոցառմանն այցելելու համար: