Երևանի ամենամատչելի բնակարանները Նուբարաշենում են. «Փաստ»

«Փաստ» օրաթերթը գրում է.

Ըստ ՀՀ կառավարությանն առընթեր անշարժ գույքի կադաստրի պետական կոմիտեի ամփոփ տեղեկատվության՝ 2017թ. մայիսին հանրապետությունում անշարժ գույքի նկատմամբ իրականացվել են 15 708 գործարքներ: Այս մասին տեղեկանում ենք Ազգային վիճակագրական ծառայության՝ հունիսի 30–ին ծառայության պաշտոնական կայքում տեղ գտած 2017 թ. սոցիալ–տնտեսական վիճակը բնութագրող հրապարակումից:

Ըստ հրապարակման՝ այս տարվա մայիսին հանրապետությունում վերոնշյալ գործարքներից ամենից շատ իրականացվել է մայրաքաղաքում՝ ամբողջի 38,8%–ը: Երկրորդ տեղում Կոտայքի մարզն է՝ 12,1%–ով, իսկ մնացած մարզերում այդ թիվը տատանվում է 2,6–7,5%–ի սահմաններում:

Միաժամանակ, հրապարակումից տեղեկանում ենք, որ մայիսին իրականացված գործարքների մեծ մասը վերաբերում է օտարմանը և այլ պետական գրանցումներին, երկուսի դեպքում էլ այն կազմում է 28,3%: Գրավադրումն ու ժառանգությունը կազմել են համապատասխանաբար 15,1 և 11,5%, իսկ ամենից քիչ էլ իրականացվել են վարձակալությանը վերաբերող գործարքներ, այն է՝ 4,7%:

Ուսումնասիրության մեջ նաև ներկայացվում է, թե այս տարվա մայիսին որքան են արժեցել Երևանի բազմաբնակարան շենքերի բնակարանների շուկայական միջին գներն ըստ վարչական շրջանների:

Նշենք, որ 1 քառակուսի մետր մակերեսի հաշվարկով շուկայական միջին գները տատանվում են 156–450 հազար դրամի սահմաններում: Բնականաբար մեծ թիվը վերաբերում է Երևանի Կենտրոն վարչական շրջանին, իսկ ամենից մատչելի բնակարաններ կարելի է ձեռք բերել Նուբարաշենում:

Համեմատաբար միջին գներ են սահմանված մայրաքաղաքի Աջափնյակ, Նոր–Նորք և Մալաթիա–Սեբաստիա թաղամասերի համար, համապատասխանաբար՝ 226 հազար 250 և 230 հազար դրամ մեկ քառակուսի մետրի համար:

Նշենք նաև, որ մայիսին ապրիլ ամսվա համեմատությամբ որոշ վարչական շրջաններում բնակարանների 1 քառակուսի մետր մակերեսի համար նկատելի բարձրացում է տեղի ունեցել: Մասնավորապես դա զգացվել է Երևանի Կենտրոն և Արաբկիր վարչական շրջաններում: Այսպես, եթե ապրիլին կարելի էր Կենտրոնում բնակարանի 1 քառակուսի մետր մակերեսի համար վճարել 427 հազար դրամ, ապա մեկ ամիս անց արդեն 450 հազար դրամ: Ստացվում է, որ 23 հազար դրամի չափով թանկացում է գրանցվել:

Իհարկե թանկացման հետ զուգահեռ նաև բնակարանների 1 քառակուսի մետր մակերեսի համար գնի նվազում է դիտվել: Մասնավորապես այս տարվա մայիսին ապրիլի համեմատությամբ նվազել են Քանաքեռ–Զեյթուն, Նոր–Նորք, Ավան, Էրեբունի և Աջափնյակ վարչական շրջանների բնակարանների գները:

Հատկանշական է նաև այն, որ նախորդ տարվա մայիս ամսվա ցուցանիշների հետ համեմատած Երևանի գրեթե բոլոր վարչական շրջանների բնակարանների գները նվազել են, բացառությամբ՝ Կենտրոնի: Այստեղ հակառակը՝ միայն ավելացում է դիտվել: 2016 թ. մայիսին Կենտրոն վարչական շրջանի տարածքում գտնվող բնակարանների 1 քառակուսի մետր մակերեսի գինը կազմել է 428 հազար դրամ, և ինչպես վերևում էինք նշել այս տարվա ապրիլին այն կազմել էր 427 հազար դրամ, այսինքն՝ նվազել էր, սակայն մեկ ամիս անց կրկին ու կտրուկ բարձրացել:

Շարունակությունը` «Փաստ» օրաթերթի այսօրվա համարում