Թուրքիայում նորից զինվորների սննդային թունավորման զանգվածային դեպք է գրանցվել

Թուրքիայում զինվորների զանգվածային սննդային թունավորման հերթական դեպքն է գրանցվել, և այս անգամ Էդիրնե քաղաքի զինվորական զորամասի 14 զինծառայող է տեղափոխվել հիվանդանոց, գրում է demokrathaber.org-ը:

Վերջին 1 ամսվա ընթացքում սա արդեն 5-րդ դեպքն է: Հունիսի 30-ին 87 զինվոր հոսպիտալացվել էր Մուղլայում: Զինվորների մոտ նկատվել են որովայնի շրջանում սուր ցավեր և հաճախակի փսխումներ: Հունիսի 20-ին Քաստամոնու քաղաքի զորամասերից մեկում Ռամադանի պահքի ավարտի տոնական ընթրիքին մասնակցած զինվորներից 38-ը հոսպիտալացվել են թունավորման ախտանշաններով: 

Հունիսի 16-ին Մանիսայի ուսումնական զորամասերից մեկում էր թունավորում եղել, և բուժկետ դիմած 85 զինվորներից 69-ը շտապ օգնության մեքենաներով տեղափոխվել են Մանիսայի քաղաքային և Մերքեզեֆենի հիվանդանոցներ: Մայիսի 27-ին Մանիսայի ժանդարմերիայի զորամասերից մեկում թունավորումների հետևանքով հոսպիտալացվել էր ժանդարմերիայի 70 ծառայող:  Մայիսի 23-ին Մանիսայի 1-ին համազորային ուսումնական բրիգադի մեկ այլ զորամասում տեղի ունեցած սննդային թունավորման հետևանքով հոսպիտալացվել էր 1049 զինվոր, որոնցից մեկը մահացել էր:

 Հիվանդանոց տեղափոխված զինվորներից մեկը պատմել էր, թե զորամասի համար սնունդ արտադրող և մատակարարող ընկերությունը պատկանում է Թուրքիայի նախագահ Ռեջեփ Թայիփ Էրդողանի զարմիկին: Մանիսայի նահանգապետ Մուստաֆա Հաքան Գյուվենչերը հայտարարել էր վերջին թունավորման գործով 24 ձերբակալվածի մասին: