Նկարահանման տաղավարում ես մոռանում եմ այն ամենի մասին, ինչն ինձ կարող է նյարդայնացնել. Զառա Ղազարյան

Citylife.am- Զառա, ինչպե՞ս մուտք գործեցիք հեռուստատեսություն:

Զառա- Մասնագիտությամբ լրագրող եմ, սիրում եմ մասնագիտությունս: Լրագրության ասպարեզում առաջին քայլերս արել եմ՝ լուսաբանելով սկզբում ասուլիսներ, հետո արդեն Ազգային ժողովի նիստերը, կառավարություն…Ավելի քան չորս տարի: Ապա  եկավ մի պահ, երբ ուղղակի հասկացա, որ փոփոխություն է պետք: Մագիստրատուրայիս դասերի շրջանակում մասնակցում էի 21TV-ի գլխավոր պրոդյուսեր Գոռ Հարությունյանի հաղորդավարական վարպետության դասերին: Հնարավորություն ունեցա մասնակցելու 21TV-ի քասթինգներին: Ոչ մի քասթինգ չեմ անցել)) Ընդունվեցի սկզբում, որպես հաղորդումներից մեկի ադմինիստրատոր, ապա լրագրող, հիմա էլ արդեն գրածներս ուղղակի էկրանից ասում եմ որպես հաղորդավարուհի:Citylife.am-Արդյոք հաղորդավարուհի դառնալը ձեր մանկությա՞ն երազանքն էր:

Զառա- Գրել և կարդալ: Մասնագիտության հարցում միշտ կողմնորոշված եմ եղել: Դառնալու եմ լրագրող-հաղորդավարուհի: Բակի ուղղակի հոբբին` ճամբարներ (իմ ժամանակ դեռ բակերում ճամբարներ էինք անում) վարելը, ուրիշ բակի ճամբարների  համար սցենարներ գրելը մի օր վերածվեց ավելի լուրջ բանի, և այսօր ես կյանքս առանց իմ մասնագիտության, առանց գրելու իրոք չեմ պատկերացնում:

Citylife.am- Ի՞նչ զգացողություններ ունեցաք երբ առաջին անգամ ձեզ տեսաք հեռուստացույցով:

Զառա-  Հեռուստաընկերություններից մեկի շոուի համար ծափահարողներ էին պետք, և առաջին անգամ ինքս ինձ եթերում տեսել եմ երկրորդ պլանի առաջին շարքում նստած՝ դեմքի լուրջ արտահայտությամբ ու պատասխանատու ծափահարելիս ))) Եթե ՖայլPro-ի շրջանակներում ասեմ, որովհետև առաջին լուրջ եթերս հենց դա էր, ապա սպասվածից ավելի վատ: Համենայն դեպս ինձ համար: Բայց ժամանակի հետ, պրոֆեսիոնալ մարդկանց կողքին, նրանց օգնությամբ ամեն ինչ հունի մեջ ընկավ: Ամեն վայրկյան աշխատելու տեղ կա, ամեն եթերից հետո փոխվում եմ:Citylife.am- Զառա, Դուք շատ եթերային եք և գեղեցիկ համաձայն եք, որ գեղեցիկ մարդկանց ամեն բան տրվում է շատ հեշտ և պարզ:

Զառա– Շնորհակալ եմ ինձ գեղեցիկ համարելու համար: Արտաքինն իհարկե կարևոր է, բայց ժամանակավոր, խաբուսիկ և անկայուն: Միայն դրա վրա հույս դնելով՝ շատ առաջ չես գնա: Ինչ էլ ձեռք բերես, այն կլինի ոչ ամուր հիմքերով: Խոսքս ցանկացած բնագավառի մասին է: Բայց եթե առանձնացնենք մեր մասնագիտությունը, ապա հեռուստադիտողը միանգամից հասկանում է էկրանից այն կողմ խելացի՞ մարդ է, ինտելեկտ ունի՞, պե՞տք է նրա ասածին վստահել, թե՞ հակառակը:Citylife.am- Ձեր կարծիքով ի՞նչ է անհրաժեշտ լավ հաղորդավարուհի դառնալու համար:

Զառա- Լավ ասվածը հարաբերական է: Բայց եթե փորձեմ առանձնացնել մի քանի բնորոշում, ապա` գեղեցիկ խոսք, հարուստ բառապաշար, ոճի զգացողություն, ներքին կոկիկություն, շփվելու ունակություն, սեփական մտքերդ տեղ հասցնելու կարողություն:

Citylife.am- Հաղորդավարուհի դառնալուց հետո ի՞նչ է փոխվել ձեր կյանքում:

Զառա- Էական ոչ մի փոփոխություն չի եղել: Վերացել է միայն իմ գլխավոր, այսպես ասեմ, թերություններից մեկը` ակտիվ ժեստերս: Ես տեսակով էմոցիոնալ եմ և էմոցիաներս միշտ ժեստերի միջոցով էմ արտահայտում: Հիմա զգում եմ, որ դա այլևս չկա, կամ կա, բայց շատ քիչ:

Citylife.am- Ի՞նչը կարող է ձեզ նյարդայնացնել նկարահանման հրապարակում:

Զառա- Նկարահանման տաղավարում ես մոռանում եմ այն ամենի մասին, ինչն ինձ կարող է նյարդայնացնել:Citylife.am- Ունե՞ք իդեալ հայկական հերուստատեսությունում, ում կցանկանաք նմանվել:

Զառա- Իդեալներ չեմ ունենում, ուղղակի կան մարդիկ, որոնցից կարող եմ ոգեշնչվել: Հայրենական եթերից կառանձնացնեմ իմ դասախոսին` Արթուր Բախտամյանին, ում եթերային հանգստությունը, խոսքը, հարցազրույցների ժամանակ համբերատար լսելու, չընդհատելու ունակությունն ինձ միշտ գրավել է: Իսկ ընդհանուր առմամբ որպես ոգեշնչման աղբյուրներ՝ լրագրողի մասնագիտական որակներով, ինձ համար միշտ եղել են Վլադիմիր Պոզներն ու Լարի Քինգը, իսկ հաղորդավարական հմտություններով և մարդկանց հետ շփման անմիջականությամբ, իհարկե, Օպրա Ուինֆին:Citylife.am-Դուք, նոր հաղորդավարուհի լինելով հանդերձ, ի՞նչ նոր ներդրում ունեք հայկական հեռուստատեսությունում:

Զառա- Դեռ ամեն ինչ առջևում է ))

Citylife.am- Ի՞նչը կստիպի Զառա Ղազարյանին լքել հեռուստատեսությունը:

Զառա-  Անկանխատեսելի է և չես կարող ասել` վաղն ինչ կլինի: Գուցե իմ հիմնական մասնագիտությանը` լրագության ոլորտում արդեն մեկ այլ հարթության վրա ունեցած հաջողությունները, որովհետև առաջիկայում մասնագիտական այլ հմտություններ ձեռք բերելու ծրագրեր կան:

Citylife.am- Շնորհակալ եմ հաճելի և հետաքրքիր հարցազրույցի համար: Մաղթում ենք նորանոր հաջողություններ: