Զինծառայողների ապահովագրության հիմնադրամը 16 փոխհատուցում է կատարել

Զինծառայողների ապահովագրության հիմնադրամը 16 փոխհատուցում է կատարել, որոնցից 14-ը՝ զոհված զինծառայողների ընտանիքներին, իսկ 2-ը՝ հաշմանդամ զինծառայողներին: «Արմենպրես»-ի հաղորդմամբ` այս մասին հուլիսի 3-ին Հիմնադրամի հոգաբարձուների խորհրդի նիստի ժամանակ ասաց ՀՀ կենտրոնական բանկի իրավաբանական վարչության պետ, Հիմնադրամի տնօրեն Վարուժան Ավետիքյանը: Նրա խոսքով` 2 հաշմանդամ զինծառայողներից մեկը եղել է առաջին, մյուսը` երկրորդ խմբի:

«Գումարները հատուցել ենք հայտը ՊՆ-ից ստանալուց հետո առավելագույնը եռօրյա ժամկետում: Կապվել ենք մեր գործընկեր բանկերի հետ հաշիվները բացելու համար: Համագործակցում ենք երեք բանկերի հետ: Բանկն ընտրելիս փորձում ենք պարզել, թե որ բանկի հետ է զինծառայողների ընտանիքներին կամ հաշմանդամ զինծառայողներին համար նպատակահարմար գործ ունենալ»,- ասաց Ավետիքյանը:

Նրա խոսքով` կատարվել է 162 մլն դրամի հատուցում, որից 88 մլն 350 հազարը, որը կազմում է ամբողջի 54,5 տոկոսը` շարքային և կրտսեր ենթասպաներին, ենթասպաներին` 31 մլն 250 հազար` 19,3 տոկոս, սպաներին հատուցվել է 42 մլն 400 հազար կամ ընդհանուրի մոտ 26 տոկոսը: Հիմնադրամը պարտադիր հավաքագրման միջոցներով հավաքագրել է 2 մլրդ 207 մլն 364 հազար դրամ, նվիրաբերություններով` 44 մլն 944 հազար դրամ, որի 20 տոկոսը կատարվել է կայքի միջոցով, շուրջ 80 տոկոսը բանկային փոխանցումների, և 0,5 տոկոսը կարճ հաղորդագրությունների միջոցով:

ՀՀ պաշտպանության նախարար, Հիմնադրամի խորհրդի նախագահ Վիգեն Սարգսյանի խոսքով` գործընկեր բանկերի ընտրությունը կատարվել է բաց քննարկումների արդյունքում:

«Ընտրել ենք նրանց, որոնք ամենալավ ծառայություններն ու պայմաններն է առաջարկել»,- ասաց նախարարը: