Գեղարքունիքում մեկնարկեց ամառային զորակոչը

 Գեղարքունիքի մարզում հուլիսի 3-ի առավոտվանից մեկնարկեց ամառային զորակոչը: Նորակոչիկները Հայոց բանակ ճանապարհվեցին Գավառի, Մարտունու, Սեւանի եւ Վարդենիսի զինվորական կոմիսարիատներից: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի զորահավաքային նախապատրաստության բաժնի վարիչ Տիգրան Հակոբյանը, այսօր առավոտյան ժամերից արդեն մարդաշատ էին ՀՀ ՊՆ տարածքային զինվորական կոմիսարիատները, որտեղից նորակոչիկների ծնողները եւ հարազատները Հայոց բանակ են ճանապարհում իրենց զավակներին: «Տոնական միջոցառումները նորակոչիկների ընտանիքներում սկսվել էր հուլիսի 2-ից, երբ նորակոչիկներին հանդիսավոր պայմաններում Հայոց բանակ ճանապարհելու էին եկել հարազատները, համագյուղացիները, ուսուցիչներն ու դասընկերները: Բանակ ճանապարհելու խնջույքներն անցել են առատ սեղանների շուրջ, չընդմիջվող եւ հուզումնառատ բարեմաղթանքներով: Այսօր առավոտվանից այդ միջոցառումները եւ բարեմաղթանքները ստացել են պետական ուղղվածություն, որոնք անցկացվում են զինկոմիսարիատներում եւ Հայ առաքելական եկեղեցու Գեղարքունյաց թեմի եկեղեցիներում: Գավառի, Սեւանի, Վարդենիսի եւ Մարտունու տարածքային զինվորական կոմիսարիատներում հրավիրված հավաքներից հետո նորակոչիկները ծաղիկներ եւ ծաղկեպսակներ խոնարհեցին Արցախյան ազատամարտի զոհերի հիշատակը հավերժող հուշարձաններին եւ երազանքների մոմեր վառեցին իրենց բնակավայրերի եկեղեցիներում՝ միաժամանակ ստանալով հոգեւոր հայրերի օրհնությունը: 
Նորակոչիկներին բարեմաղթանքների եւ քաջալերանքի խոսքեր ուղղվեցին զինկոմիսարիատներում եւ իրենց բնակավայրերի եկեղեցիներում կազմակերպված միջոցառումների եւ մոմավառության ընթացքում: Վարդենիսի տարածքում նորակոչիկներին բարեմաղթանքի խոսք է ուղղել ՀՀ ԶՈւ բանակային երկրորդ կորպուսի հրամանատար Դավիթ Մանուկյանը, իսկ Բանակային երկրորդ կորպուսի եւ կայազորի հոգեւոր հովիվ Վոլոդյա սարկավագը նրանց նվիրել է Հայ զինվորի Աղոթքը եւ Աշոտ Երկաթի՝ Հայոց բանակի պահապան խաչը պատկերող թերթիկը: Ինչպես առաջին զորակոչի նախօրեին, այնպես էլ այսօրվա միջոցառումներին մեր նորակոչիկներին բանակ ճանապարհելու էին եկել համայնքների ղեկավարները, մարզպետարանի բարձրաստիճան պաշտոնյաներ: Կարեւորն այն է, որ նորակոչիկները բանակ են մեկնում բարձր տրամադրությամբ, նրանց ծնողներն ու հարազատները քաջալերում են իրենց զավակներին ու քաջալերվում պետական մարմինների, հասարակության կողմից: Հայրենիքի պաշտպանության գործում մեր հասարակությունը եւ պետությունը դարձել են մեկ միասնական բռունցք»,- հավաստեց Տիգրան Հակոբյանը:
Նույն աղբյուրի համաձայն՝ Գեղարքունիքից Հայոց բանակ զորակոչված տղաներն այսօր այցելել են Հայաստանի պատմության պետական եւ Ցեղասպանության թանգարաններ եւ Մատենադարան, ապա ժամանել հավաքակայան, որտեղից վիճակահանությամբ բաշխվելու են համապատասխան զորամասեր: 
Ճամբարակի տարածքային զինկոմիսարիատում զորակոչի մեկնարկը կտրվի հուլիսի 9-ին: