«Արաբկիր» հիմնադրամը, Կավուկչյան ընտանիքը և «Սթարկի» ընկերությունը մոտ 2000 անձանց կապահովեն լսողական սարքերով

«Արաբկիր» միացյալ մանկական բարեգործական հիմնադրամը, Լոս Անջելեսի Կավուկչյան ընտանիքը և լսողական սարքերի արտադրող ամերիկյան «Սթարկի» (Starkey) ընկերությունը Հայաստանում համատեղ իրականացվող բարեգործական առաքելության շրջանակներում լսողական սարքերով  են ապահովելու մոտ 2000 անձանց։ Այս մասին «Արմենպրես»-ին տեղեկացրին«Արաբկիր» միացյալ մանկական բարեգործական հիմնադրամից, որի հաղորդագրության մեջ նշված է. «2015թ. «Արաբկիր» Միացյալ մանկական բարեգործական հիմնադրամը Լոս Անջելեսի Կավուկչյան ընտանիքի ջանքերով  լսողական սարքերի արդյունաբերող ամերիկյան հանրահայտ Սթարկի (Starkey) ընկերության հետ համատեղ Հայաստանում սկիզբ դրեց բարեգործական մի առաքելության՝  ապահովելու կարիքավոր անձանց հատուկ լսողական սարքերով: Այժմ՝ ծրագիրը՝ բարեհաջող ավարտելով իր առաջին փուլը, անցում է կատարում երկրորդ փուլին, որը տեղի կունենասույն թվականի հունիսի 30-ից հուլիսի 2-ը Երևանում՝ Երևան քաղաքի և Տավուշի մարզի, իսկ հուլիսի 3-ից 6-ը Գյումրիում՝ Շիրակի և Լոռու մարզերի շահառուների համար, որտեղ կկազմակերպվեն լսողության սկրինինգի, սարքերի կաղապարների չափումների աշխատանքներ, ինչպես նաև համակարգող անձնակազմի ուսուցողական դասընթացներ:

Ծրագրի հիմնական թիրախ են հանդիսանում սոցիալապես անապահով և խոցելի խմբերը: Սթարկի ընկերությունն ու Սթարկի լսողության հիմնադրամը սույն առաքելությունն իրականացրել են աշխարհի 106 երկրներում, որոնցից 52-ում այն կրում է շարունակական բնույթ: Հայաստանը լինելու է թվով 107-ը, որի հաջողության դեպքում այն նույնպես լինելու է շարունակական և կայուն ծրագիր:

Ծրագիրը բաղկացած է երեք փուլից. կարիքավոր անձանց հայտնաբերում և  լսողության սկրինինգ, համակարգող անձնակազմի կրթում և սարքերի կաղապարների չափում և ապա մոտ 2000 անձանց լսողական սարքերի  տեղադրում (4000 սարք): Ըստ առաջին փուլի տվյալների՝ հայտնաբերված և լսողության ստուգում անցած կարիքավորների թիվը Երևան քաղաքում կազմում է 533, Շիրակի մարզում՝ 729, Լոռու մարզում՝ 287 և Տավուշի մարզում 245: Ընդգրկված են տարիքային բոլոր խմբերը: Ծրագրի կազմակերպիչներն ապահովելու են Տավուշի մարզի շահառուների տեղափոխումը Երևան և հետ, ինչպես նաև Լոռու մարզի շահառուների տեղափոխումը Գյումրի և հետ:

«Արաբկիր» Միացյալ մանկական բարեգործական հիմնադրամը, ստեղծվել է 1995թ. և տարիներ շարունակ գործունեություն է ծավալում մտավոր, ֆիզիկական, լսողական, հաղորդակցման և այլ խնդիրներ ունեցող անձանց վերականգնողական ծառայությունների և հասարակության մեջ ինտեգրման ծրագրերի իրականացման ուղղությամբ»: