Աթեշյանի լիազորությունների դադարեցման մասին պատրիարքարանի որոշումը հանձնվել է Ստամբուլի նահանգապետարանին

Պոլսո Հայոց պատրիարքարանը հունիսի 29-ին պաշտոնապես Ստամբուլի նահանգապետարան է ներկայացրել Եկեղեցական համագումար ժողովի կողմից ընդունված վերջին որոշումը, որով դադարեցված են համարվում Արամ արքեպիսկոպոս Աթեշյանի լիազորությունները որպես պատրիարքական ընդհանուր փոխանորդ: Ինչպես հաղորդում է «Արմենպրես»-ը, այս մասին հայտնում է Ստամբուլի հայկական «Ժամանակ» օրաթերթը:

Եկեղեցական ժողովի որոշումը նահանգապետարանին է հանձնել Կրոնական ժողովի ատենապետ Սահակ եպիսկոպոս Մաշալյանը: Նա հայտնել է, որ որոշումը կկցվի նախապես Ստամբուլի նահանգապետարան ուղղված դիմումին: Այդպիսով, պետությանը պատրիարքական ընտրության գործընթացի վերաբերյալ ներկայացված թղթածրարն ավելի ամբողջական կդառնա: «Այժմ պետք է սպասենք, որ նահանգապետարանի կամ պատկան այլ մարմինների կողմից նամակ ուղարկվի տեղապահ Գարեգին արքեպիսկոպոս Բեքչյանին, կամ նրան հրավիրեն նահանգապետարան հանդիպման»,- նշել է Մաշալյանը:

Հուլիսի 4-ին պատրիարքարանում Բեքչյանի գլխավորությամբ տեղի կունենա համայնքային խորհրդակցություն, որտեղ բացի համայնքային հաստատությունների ղեկավարներից ներկա կլինեն նաև Կրոնական ժողովի անդամները: Այդ ժողովի ընթացքում պատրիարքի ընտրության կազմակերպման նպատակով ստեղծվելու է Նախաձեռնող խումբ, որն ունենալու է 17 անդամ: Նրանցից 12-ին առաջարկելու են և ընտրեն համայնքային մարմինների ներկայացուցիչները, նրանց գումարվելու են ևս հինգ անդամ պատրիարքարանին տրվող քվոտայի միջոցով:

Դրանցով ավարտված են համարվելու պատրիարքական ընտրության համար համայնքից կախված բոլոր նախապատրաստությունները:

Նախաձեռնող խմբի ձևավորումից հետո աստիճանաբար կազմավորվելու են տեղական ընտրական հանձնախմբեր, որոնք գործելու են Ստամբուլի տարբեր թաղերում:

Պոլսո Հայոց պատրիարքարանի եկեղեցական ընդհանուր ժողովը հունիսի 28-ին որոշում է կայացրել դադարեցնել Արամ արքեպիսկոպոս Աթեշյանի լիազորությունները որպես պատրիարքական փոխանորդ: Որոշումը կայացվել է 22 կողմ և երկու դեմ ձայներով:

Որոշման ընդունումից հետո Գարեգին արքեպիսկոպոս Բեքչյանն արդեն պաշտոնապես ստանձնել է տեղապահի իր պաշտոնը, որում ընտրվել էր մայիսի 24-ին: