Ժիրայր Սեֆիլյանի եւ մյուսների գործով դատական նիստը չմեկնարկած` ընդմիջվեց

Ժիրայր Սեֆիլյանի եւ մյուսների գործով դատական նիստն այսօր՝ հունիսի 30-ին, դեռ չմեկնարկած ընդմիջվեց: Ժիրայր Սեֆիլյանի շահերի պաշտպան Տիգրան Հայրապետյանը դատարանին միջնորդություն ներկայացրեց դատական նիստը հետաձգելու կամ ընդմիջելու՝ պատճառաբանելով, որ նախորդ դատական նիստին ներկա չի եղել եւ ժամանակ է անհրաժեշտ, որ կարողանա ծանոթանալ, թե ինչ է տեղի ունեցել նախորդ նիտի ընթացքում: Դատարանը նրա միջնորդությունը մասնակի բավարարեց` նիստը մեկ ժամով ընդմիջելով:

Դատական նիստը կվերսկսվի ժամը 12:30-ին:

Նշենք, որ այսօրվա նիստին ներկա չեն ամբաստանյալներ Ժիրայր Սեֆիլյանը, Ներսես Ժողոսյանն ու Գեւորգ Սաֆարյանը, նրանց նկատմամբ դատարանը նախորդ դատական նիստին սանկցիա էր կիրառել եւ հեռացրել նիստերի դահլիճից. Սեֆիլյանը՝ 6 ժամով, Ներսես Պողսյանը 5 ժամով, իսկ Սաֆարյանը՝ 3 ժամով:

Նշենք, որ այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն արվում են արտագնա` Շենգավիթ վարչական շրջանի ընդհանուր իրավասության դատարանում:

Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար:

Բացի այդ, ըստ մեղադրանքի, 2015 թվականի նոյեմբերից մինչեւ 2016 թվականի մայիսի 18-ն ընկած ժամանակահատվածում, կազմակերպված խմբի կազմում ապօրինի կերպով ձեռք է բերել, պահել եւ փոխադրել հրազեն եւ ռազմամթերք, նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել եւ պահել ռազմավարական նշանակության շենքեր, շինություններ, սակայն իր կամքից անկախ հանգամանքներով ավարտին չի հասցվել:  Սեֆիլյանին մեղադրանք է առաջադրվել Քրեական օրենսգրքի 35-225-րդ հոդվածի 1-ին մասով, 35-219-րդ հոդվածի 3-րդ մասի 1-ին կետով: