ConfedCup. Գերմանիան հաղթեց խոշոր հաշվով եւ դուրս եկավ եզրափակիչ

Ռուսաստանում ավարտին մոտեցող ՖԻՖԱ-ի Կոնֆեդերացիաների գավաթի 8-րդ խաղարկության հաղթողի տիտղոսը կվիճարկեն ֆուտբոլի աշխարհի գործող չեմպիոն Գերմանիայի եւ Հարավային Ամերիկայի գավաթակիր Չիլիի հավաքականները:

Երկրորդ կիսաեզրափակիչում գերմանացիները 4:1 հաշվով վստահ հաղթանակ տարան Մեքսիկայի հավաքականի նկատմամբ:

Սոչիի «Ֆիշտ» ստադիոնում կայացած հանդիպման սկզբնամասը շատ հաջող ստացվեց Բունդեսթիմի համար: Արդեն 8-րդ րոպեին հաշիվը 2:0 էր: 2 րոպեում դուբլի հեղինակ էր դարձել Գելզենկիրխենի «Շալկեի» 22-ամյա կիսապաշտպան Լեոն Գորեցկան: 2:0 հաշիվը պահպանվեց մինչեւ ընդմիջում, իսկ երկրորդ խաղակեսում գերմանացիները խփեցին նաեւ երրորդ գոլը: 59-րդ րոպեին աչքի ընկավ «Լայպցիգի» կիսապաշտպան Տիմո Վերները: Նախավերջին րոպեին մեքսիկացիները կրճատեցին հաշիվը, սակայն ավելացված ժամանակում փոխարինման դուրս եկած Ամին Յունեսը խփեց եվրոպացիների չորրորդ գոլը՝ վերջակետ դնելով խաղին:

Հիշեցնենք, որ մյուս կիսաեզրափակիչում Չիլիի հավաքականը հետխաղյա 11 մետրանոցներով հաղթել էր Եվրոպայի չեմպիոն պորտուգալացիներին: Հանդիպման հիմնական եւ լրացուցիչ ժամանակն ավարտվել էր 0:0 հաշվով:

Կոնֆեդերացիաների Գավաթի եզրափակիչը կկայանա հուլիսի 2-ին Սանկտ Պետերբուրգում: Պորտուգալիայի եւ Մեքսիկայի հավաքականները երրորդ տեղի համար խաղը կանցկացնեն հուլիսի 2-ին Մոսկվայի «Սպարտակ» ստադիոնում:

Կոնֆեդերացիաների գավաթ, կիսաեզրափակիչ

Գերմանիա – Մեքսիկա՝ 4:1 

Լեոն Գորեցկա, 6, 8, Տիմո Վերներ, 59, Ամին Յունես, 90+1 – Մարկո Ֆաբիան, 89

Գերմանիա. Տեր Շտեգեն, Հեկտոր, Գինտեր, Ռյուդիգեր, Ռուդի, Կիմիխ, Հենդրիխս, Դրաքսլեր (Յունես, 81), Գորեցկա (Էմրե Ջան, 67), Վերներ, Շտինդլ (Բրանդտ, 78):

Մեքսիկա. Օչոա, Լայուն, Արաուխո, Մորենո, Ալանիս, Խոնաթան դոս Սանթոս (Ռաֆայել Մարկես, 66), Հերերա, Ջովանի դոս Սանթոս (Ֆաբիան, 63), Խիմենես, Ակինո (Լոզանո, 46), Չիչարիտո: