Երթուղու սպասարկման տուրքը կհանվի, փոխարենը՝ հնարավոր է արտոնագրային հարկի դրույքաչափն ավելանա. «Փաստ»

«Փաստ» օրաթերթը գրում է.

 

«Ավտոմոբիլային տրանսպորտի մասին» ՀՀ օրենքում փոփոխություններ կիրականացվեն: Մասնավորապես նախատեսվում է կանոնավոր ուղևորափոխադրումներ իրականացնող կազմակերպությունների կողմից երթուղու սպասարկման պետական տարեկան տուրքը հանել, ինչը կթեթևացնի փոխադրողների հարկային բեռը և դրական ազդեցություն կունենա ուղևորափոխադրումների բնագավառի գործարար միջավայրի վրա: Համենայն դեպս այսպես է գրված փոփոխության ենթակա օրենքի նախագծում: Այս մասին որոշման նախագիծը կներկայացվի կառավարությանը` այսօր կայանալիք նիստի ընթացքում:

Ըստ նախագծի՝ կատարված ուսումնասիրությունները ցույց են տվել, որ հանրապետությունում առկա են բազմաթիվ համայնքներ, որոնց տրանսպորտային կանոնավոր սպասարկումն ապահովելու նպատակով «Ավտոմոբիլային տրանսպորտի մասին» օրենքի 10–րդ հոդվածով սահմանված լիազոր մարմինների` միջմարզային երթուղիների դեպքում` ՀՀ տրանսպորտի, կապի և տեղեկատվական տեխնոլոգիաների նախարարության կողմից, իսկ ներմարզային երթուղիների դեպքում` մարզպետարանների կողմից բազմիցս հայտարարվել են մրցույթներ, սակայն դրանք չեն կայացել մասնակիցների բացակայության պաճառով: Հիմնական պատճառը կայանում է դրանց ոչ տնտեսական հիմնավորմամբ:

Ինչպես կանոնավոր փոխադրումների լիցենզիայի տուրքը, այնպես էլ կանոնավոր ուղևորափոխադրումներ իրականացնող կազմակերպությունների կողմից երթուղու սպասարկման պետական տարեկան տուրքը կազմում է 100 հազար դրամ: 2015 թ. կանոնավոր փոխադրումների լիցենզավորումը հանվեց, սակայն դրա համար վճարվող տուրքը պահպանվեց` դառնալով երթուղու սպասարկման տուրք:

Նոր հարկային օրենսգրքով նախատեսված Արտոնագրային հարկի ամսական դրույքաչափ է նախատեսված մեկ միավորի համար ավտոբուսների դեպքում նստատեղ Երևան քաղաքում, մարզկենտրոններում 2000, այլ քաղաքներում 2000, սահմանամերձ գյուղերում 1000, իսկ այլ վայրերում 1500, միկրոավտոբուսային փոխադրումների դեպքում համապատասխանաբար` 3000, 2400, 2400, 1300 և 1900 գործակիցներ:

Այսինքն եթե նախկինում, օրինակ Երևան քաղաքում հաշվառված կանոնավոր ուղևորափոխադրող կազմակերպությունը մեկ ավտոբուսի համար ամսական վճարում էր 2000x1x23=46000, ապա հիմա պետք է վճարի ավելի շատ՝ 2400x23 =55200, իսկ միրոավտոբուսի դեպքում՝ 2000x1.3x13=33800 դրամի փոխարեն 3000x13=39000:

Նկատի ունենալով, որ ներկայում Երևան քաղաքում շահագործվում է 620 ավտոբուս և 1550 միկրոավտոբոս, ամսական բյուջեի մուտքերը կկազմեն համապատասխանաբար մոտ 34 միլիոն 224 հազար և 60 միլիոն 450 հազար դրամ: Ընդհանուրը տարեկան կկազմի մոտ 1 միլիարդ 136 միլիոն 88 հազար դրամ:

Ներկայում կատարվող վճարումները կազմում են մոտ 970 միլիոն 920 հազար դրամ: Տրանսպորտի և կապի նախարարությունից հետևություն են արել, որ սրա արդյունքում Երևան քաղաքի մասով բյուջեի մուտքերը կաճեն մոտ 165 միլիոն 168 հազար դրամով: Միաժամանակ աճ է կանխատեսվում նաև միջմարզային փոխադրումների մասով:

Նախագծի ընդունման դեպքում ակնկալվում է թեթևացնել կանոնավոր փոխադրումներ իրականացնող կազմակերպությունների հարկային բեռը՝ դրանով նպաստելով հանրապետության տրանսպորտային պարկի թարմացմանը, հանրապետության բոլոր բնակավայրերի տրանսպորտային սպասարկմամբ ապահովմանը, ուղևորափոխադրումների բնագավառում սպասարկման որակի և անվտանգության բարձրացմանը, ՀՀ բոլոր քաղաքացիների ազատ տեղաշարժման իրավունքի ապահովմանը:

Տրանսպորտի, կապի և տեղեկատվական տեխնոլոգիաների նախարարության աշխատակազմի Փոխադրումների քաղաքականության բաժնի պետ Դավիթ Մելքոնյանը «Փաստի» այն հարցին, թե մի կողմից տուրքը հանվում է, սակայն մյուս կողմից էլ Արտոնագրային հարկի ամսական դրույքաչափի ավելացում է սպասվում դիտարկմանը պատասխանեց, որ հարկային պարտավորությունների մասով նա մեկնաբանություն չի կարող անել:

«Դա ֆիքսված է Հարկային օրենսգրքով: Մենք ասում ենք, որ նոր Հարկային օրենսգրքով կարող է որոշ չափով ավելացումներ լինեն, դրա համար էլ արդեն որոշ միջոցառումներ ենք սկսել իրականացնել, այդ թվում՝ միասնական երթուղային ցանցի ձևավորում, փոխադրումների խրախուսում, կանոնավոր ուղևորափոխադրումների զարգացում, անվտանգության և սպասարկման որակի բարձրացում: Եվ այս բոլորի կոնտեքստում նաև առաջարկում ենք տուրքը հանել, քանի որ ենթադրվում է, որ կարող է բարձրացում լինել: Գուցե սպասարկման տուրքը չնչին գումար է, բայց մեր քայլերը միտված են փոխադրումների ընդհանուր զարգացմանը»,– նշեց Դավիթ Մելքոնյանը:

 

  Շարունակությունը` «Փաստ» օրաթերթի այսօրվա համարում