Ռուսաց լեզվից անբավարարների թիվը միշտ բարձր է լինում թույլ պատրաստվածության և բովանդակային խնդիրների պատճառով. Արա Իսպիրյան

Ռուսաց լեզվից անբավարարների թիվը միշտ էլ բարձր է լինում, պատճառներն են՝ թույլ պատրաստվածությունն ու բովանդակային խնդիրները: Այս մասին Tert.am-ի հետ զրույցում ասաց Գնահատման և թեստավորման կենտրոնի տնօրեն Արա Իսպիրյանը։

«Ռուսաց լեզուն մյուս օտար լեզուներից տարբերվում է բովանդակային ավելի ծանր հատվածով, ինչպես նաև դիմորդների պատրաստվածություն է թույլ: Բոլոր տարիներին էլ նման արդյունք է գրանցվում»,- նշեց Իսպիրյանը:

Հիշեցնենք, որ ռուսաց լեզվի միասնական քննության մասնակցել է 501 դիմորդ: Առարկայից միջին միավորը կազմել է 10.2։ Անբավարար է ստացել դիմորդների 27 տոկոսը, 20 միավոր է հավաքել ընդամենը 4 հոգի: Նախորդ տարի ռուսաց լեզվից անբավարարների թիվը եղել է 29.5 տոկոս:

ԳԹԿ տնօրենը հայտնեց, որ այժմ ընթանում է երկրորդ փուլի հայտերի ընդունումը, որը տևելու է մինչև ամսի 30-ը: Երկրորդ փուլի քննությունները կանցկացվեն հուլիսի 2-8-ը, որից հետո միայն մրցույթ կհայտարարվի և պարզ կլինի, թե ովքեր են ընդունվել, ովքեր՝ ոչ:

«Երկրորդ փուլը նախատեսված է կոնկրետ դիմորդների համար: Դրանք միջին մասնագիտական ուսումնական հաստատությունների և քոլեջների շրջանավարտներն են, բոլոր այն դիմորդներն են, ովքեր հարգելի պատճառով չեն մասնակցել կամ ընդհատել են քննությունը: Նրանց մեջ են նաև բանակից նոր զորացրված և արտասահմանցի դիմորդները»,- տեղեկացրեց Իսպիրյանը: