Նունե Եսայանն ու Սոսո Պավլիաշվիլին կրկին նոր զուգերգ կներկայացնեն

Life.panorama.am-ը գրում է.

Նունե Եսայանի եւ Սոսո Պավլիաշվիլիի «Сильней, чем прежде» զուգերգի շուրջ հաջող համագործակցությունը համատեղ նոր աշխատանքի պատճառ է դարձել: Շուտով հանդիսատեսը կտեսնի նրանց նոր աշխատանքը, որի նկարահանումներն այս օրերին են ընթանում:

Life.panorama.am-ի հետ զրույցում Նունե Եսայանը պատմեց, որ ինչպես առաջին, այնպես էլ այս դեպքում համագործակցության առաջարկն իրենն է եղել:

«Իրականում դեռ առաջին անգամ, երբ Սոսոյին առաջարկեցի համագործակցել, հենց այս երգը ցույց տվեցի, բայց նա ցանկացավ, որպեսզի կյանքի կոչենք «Сильней, чем прежде» երգը: Սակայն ինքս շատ էի ուզում, որպեսզի մենք միասին ներկայացնենք նաեւ այս երգը, եւ որոշ ժամանակ անց ես կրկին նրան առաջարկեցի, այսպես ասած, պնդելով, որպեսզի հենց այս երգը ընտրենք: Երգի անունը, հեղինակներին, ռեժիսորին չեմ նշի, քանի որ ուզում ենք ամեն բան անակնկալ լինի, միայն կասեմ, որ շատ գեղեցիկ, ուրախ ու զվարճալի հայկական երգ է սպասվում»,- նշեց Նունե Եսայանը՝ հավելելով, որ երգում կլինեն եւ ռուսերեն, եւ հայերեն խոսքեր:

Նունե Եսայանի փոխանցմամբ՝ տեսահոլովակի նկարահանումները ընթացքի մեջ են, եւ ամեն բան արվում է, որպեսզի հնրավորինս շուտ այն ներկայացվի հանդիսատեսին:

Հետաքրքրվելով, թե Սոսո Պավլիաշվիլին ինչպիսի՞նն է որպես գործընկեր, երգչուհին պատասխանեց.

«Նա հրաշալի մարդ է ու չափից ավելի պրոֆեսիոնալ մասնագետ: Նա կարողանում է հասցնել առավոտյան գալ Երեւան, իսկ երեկոյան մեկնել Մոսկվա, եւ ոչ մի կերպ չի թողնում, որ այդ ընթացքի հոգնությունը անդրադառնա աշխատանքի վրա: Ես հիացած եմ իր գործունեությամբ: Մենք շատ հեշտությամբ ենք միասին աշխատում, ինչը եւ մեզ հաջողություն է բերում»:

Հեղինակ՝ Անուշիկ Մելքոնյան