«Ալաշկերտ»-ը երրորդ անգամ դուրս կգա եվրոպական մրցասպարեզ

 Վ. Սարգսյանի անվան «Հանրապետական» մարզադաշտում կկայանա ՈՒԵՖԱ-ի չեմպիոնների լիգայի որակավորման առաջին փուլի առաջին հանդիպումը՝ Հայաստանի 2016/2017 թթ. չեմպիոն «Ալաշկերտի» և Անդորրայի «Սանտա Կոլոմա» թիմի միջև:

«Արմենպրես»-ի հաղորդմամբ` այս մասին գրում է ՀՖՖ-ն: Այս հանդիպումը կլինի «Ալաշկերտի» երրորդ մեկնարկը եվրագավաթների խաղարկություններում: Նորամուտը տեղի ունեցավ 2015 թ. հուլիսի 2-ին, երբ «Ալաշկերտը» Եվրոպա Լիգայի որակավորման առաջին փուլի խաղում 1:0 հաշվով հաղթեց շոտլանդական «Սենտ-Ջոնսթոնին»: Պատասխան խաղում, մնալով 10 ֆուտբոլիստով, «Ալաշկերտը», այդուհանդերձ, կարողացավ նպաստավոր արդյունքի հասնել՝ պարտվելով 1:2 հաշվով, և իր առաջին իսկ մասնակցության ընթացքում ապահովեց տեղը Եվրոպա լիգայի որակավորման երկրորդ փուլում: Այստեղ մրցակիցը ղազախստանյան «Կայրաթն» էր: Առաջին մրցավեճում պարտվելով 0:3 հաշվով՝ երևանցիները կարողացան պատասխան խաղում հաղթել 2:1 հաշվով:

Հաջորդ մրցաշրջանում «Ալաշկերտը» նշեց իր նորամուտն արդեն Չեմպիոնների լիգայի խաղարկությունում: Անդորրական «Սանտա Կոլոմայի» հետ առաջին մրցավեճն Անդորրայում ավարտվեց ոչ-ոքի՝ 0:0 հաշվով, իսկ Երևանում կայացած խաղում «Ալաշկերտը» հաղթեց 3:0 հաշվով: Երկրորդ փուլում «Ալաշկերտի» մրցակիցը Թբիլիսիի «Դինամոն» էր: Վրաստանում կայացած առաջին խաղում մեր թիմը պարտվեց 0:2 հաշվով, իսկ Երևանում կայացած մրցավեճն ավարտվեց ոչ-ոքի՝ 1:1 հաշվով: