Դեկտեմբերի 9-ին Հմայակ Հովհաննիսյանի մայրը կհրաժարվի ՀՀ քաղաքացիությունից

ՀԱՐՑԱԶՐՈՒՅՑ 14 Հոկտեմբեր, 2015 18:13

Հայաստանի քաղաքագետների միության նախագահ Հմայակ Հովհաննիսյանի մայրը մտադիր է դեկտեմբերի 9-ին՝ Մարդու իրավունքների պաշտպանության օրվա նախօրեին, բաց նամակով կտեղեկացնել նախագահ Սերժ Սարգսյանին, որ հրաժարվում է ՀՀ քաղաքացիությունից՝ ներկայացնելով իր որոշման դրդապատճառները: Այս մասին Past.am-ի հետ զրույցում ասաց ՀՔՄ նախագահ Հմայակ Հովհաննիսյանը:

«Ես անհայր եմ մեծացել: Մորս և մայրական տունը պատանդ են վերցրել և փորձում են դրանով ինձ շանտաժի ենթարկել և խլել ՀՔՄ գրասենյակը: Եթե մեկ տարի առաջ Սերժ Սարգսյանին իմ բաց նամակով տեղեկացրած չլինեի այդ մասին, երբեք չէի հավատա, որ ինքն անձամբ հավանություն է տալիս այս հրեշավոր, անմարդկային գործընթացին»,- մեզ հետ զրույցում ասաց Հմայակ Հովհաննիսյանը:

Վերջինս նշեց, որ դեկտեմբերի 9-ը պատահական չէ ընտրվել: Այդ օրը լրանում է մեկ տարին, ինչ բաց նամակ է հղել նախագահին: Հմայակ Հովհաննիսյանը տեղեկացրեց նաև, որ այդ գործով նիստը տեղի կունենա հոկտեմբերի 15-ին:

«Նիստերից առաջ ես յուրահատուկ հոգեվիճակում եմ՝ թշնամուն չէի ցանկանա գործ ունենալ մեր դատական դատարանների հետ»,- ասաց Հմայակ Հովհաննիսյանն՝ անկեղծանալով, որ Սերժ Սարգսյանն իրեն դատարաններով քարշ տալու մարտավարություն է որդեգրել, այդ է պատճառը, որ իր յուրաքանչուր խոսքն օգտագործում է որպես պատրվակ: Այդ պատճառով էլ Հովհաննիսյանը նախընտրում է լրագրողների հետ շփվել հատուկ զգուշավորությամբ:

Անդրադառնալով «Նոր Հայաստան» փրկության ճակատի գործունեությանը՝ Հմայակ Հովհաննիսյանն ասաց. «Ձգտելով իշխանափոխության՝ ես պաշտպանում եմ նաև մորս հայրենազուրկ դառնալու դառը ճակատագրից: Հուսով եմ, որ իմ խոսքերը կներկայացնեք բառացի՝ առանց աղավաղումների և հարցի մարդկային էությանը ոչ հարիր քմծիծաղի: Երբ մայրերին պատանդ են վերցնում որդիներին ունեզրկելու և մեր դեպքում՝ հասարակական կազմակերպությանը բոմժ դարձնելու նպատակով, դա իսկապես ողբերգություն է»:

Հիշեցնենք, որ Հմայակ Հովհաննիսյանն ընդգրկված է Սահմանադրական փոփոխությունների դեմ պայքարող «Նոր Հայաստան» փրկության ճակատի խորհրդի կազմում, որի մեջ են նաև Րաֆֆի Հովհաննիսյանը, Պետրոս Մակեյանը, Անդրեաս Ղուկասյանը, Ժիրայր Սեֆիլյանը, Արմեն Մարտիրոսյանը և Գարեգին Չուքասզյանը: