Ջոնի Դեփը ներողություն է խնդրել Թրամփին սպանելու մասին կատակի համար

Հոլիվուդյան հայտնի դերասան Ջոնի Դեփը ստիպված է եղել ներողություն խնդրել «Գլասթոնբերի» երաժշտական փառատոնի ժամանակ ԱՄՆ նախագահ Դոնալդ Թրամփին սպանելու մասին արած կատակի համար: 

Ինչպես նշում է Al Arabiya-ն, Սպիտակ տունն անդրադարձել է Դեփի ասածին՝ նշելով, որ նախագահ Թրամփը դատապարտում է բռնության ցանկացած տեսակն ու շատ տխուր է , որ Դեփի հռետորաբանությունը հակասում է նրա տեսակետին:

Մինչդեռ հոլիվուդյան աստղն արդարացել է՝ նշելով, որ ինքն իրոք անհաջող կատակ է արել, սակայն դա արել է միայն ներկաներին զվարճացնելու համար:

«Դա միտումնավոր կատակ չէր ու չար նպատակ չէր հետապնդում: Ես պարզապես փորձում էի զվարճացնել նրանց և ոչ մի դեպքում  ինչ-որ մեկին վնասելու ցանկություն չունեի»,-ասել է 54-ամյա դերասանը: 

Ինչպես ավելի վաղ հայտնել էր Tert.am-ը, Ջոնի Դեփը Մեծ Բրիտանիայում ընթացող «Գլասթոնբերի» երաժշտական փառատոնի ժամանակ առիթը բաց չի թողել ու համարձակ կատակ է արել ԱՄՆ նախագահ Դոնալդ Թրամփի մասին:

Բեմում գտնվելու ժամանակ Դեփն անսպասելիորեն բացականչել է. «Վերջին անգամ ե՞րբ է դերասանը սպանել նախագահին: Կարո՞ղ եք Թրամփին այստեղ բերել: Կարծում եմ՝ նա օգնության կարիք ունի»:  

Սրան ի պատասխան հավաքվածները սկսել են ոգևորված բղավել ու ծափահարել 54-ամյա աստղին:

Ի դեպ, սա առաջին դեպքը չէ, երբ հոլիվուդյան դերասանը հրապարակայնորեն իր հակակրանքն է հայտնում ԱՄՆ նախագահի հանդեպ: