Նա անփոխարինելի մարդ ու արվեստագետ էր. Ռ. Բաբայանի հիշողությունները` Ռուբեն Գևորգյանցի մասին

Երեկ` հունիսի 23-ին, 71 տարեկան հասակում կյանքից հեռացավ ՀՀ ժողովրդական արտիստ, Հայաստանի կինեմատոգրաֆիստների միության նախագահ, Երևանի թատրոնի եւ կինոյի պետական ինստիտուտի պրոֆեսոր, կինոռեժիսոր Ռուբեն Գեւորգյանցը (Կեւորկով):

Ավելի քան 60 ֆիլմերի հեղինակ Ռուբեն Գեւորգյանցի մահը մեծ կորուստ էր հայկական կինոարվեստի համար:

Երեւանի Տիկնիկյաին թատրոնի գեղարվեստական ղեկավար եւ բեմադրիչ Ռուբեն Բաբայանը Life.panorama.am-ի հետ զրույցում իր ցավակցությունը հայտնեց Ռուբեն Գեւորգյանցի հարզատներին եւ առհասարակ ողջ հայությանը:

«Ռուբեն Գեւորգյանցին վաղուց եմ ճանաչում, նրա հետ անձնական շատ լավ հարաբերություններ ունեիք: Նա փայլուն անձնավորություն էր եւ իր մտահորիզոնով, եւ կազմակերպչական ջիղով, եւ իր վերաբերումքով մարդկանց հանդեպ: Իր ղեկավարած միության անդամների հանդեպ նա շատ սրտացավ ու ուշադիր էր, սա փաստում եմ, քանի որ այդ ոլորտում աշխատել են մայրս, քույրս եւ քրոջս ամուսինը: Ռուբեն Գեւորգյանցի մահը մեծ կորուստ էր, որովհետեւ նա իր հետ տարավ նաեւ որոշակի աշխարհ: Նա անփոխարինելի մարդ ու արվեստագետ էր: Իհարկե, նրա փոխարեն ուրիշ մարդիկ կգան, ուրիշ ֆիլմեր կնկարահանվեն, ուրիշները կղեկավարեն իր միությունը, բայց այն խարիզման, որ ուներ Ռուբեն Գեւորգյանցը, այլեւս չի լինի: Նա տիեզերական աշխարհի մարդ էր` յուրաքանչյուր պարագայում հայ մնալու կարողությամբ»,- նշեց Ռ. Բաբայանը:

Ռուբեն Գեւորգյանցը երկար ժամանակ պայքարում էր ծանր հիվանդության դեմ: Մեր զրուցակցի խոսքով` նա երբեք չի տրտնջացել ու չի բողոքել.

«Նա այնքան դրական էր տրամադրված կյանքի հանդեպ, երբեք չէր դժգոհում, չնայած պատկերացնել կարելի է, թե այդ ծանր հիվանդությունը ինչպես կարող էր ազդել նրա վրա: Նա սեփական խնդիրները երբեք չէր դարձնում ուրիշների հոգս, ինչը եւս մեծ մարդու կարեւոր հատկանիշ է: Նա առանց տրտնջալու կրում էր այն ծանր խաչը, որն իրեն էր տրված: Ինձ համար նրա մահը մեծ կորուստ էր, ես այն տարիքում եմ, որ մարդիկ, երբ հեռանում են կյանքից, կարծես թե իմ կյանքի շատ կարեւոր մի մասն էլ է հեռանում: Քչերը գիտեն, որ շուրջ տասը տարի առաջ Ռուբեն Գեւորգյանցը կլինիկական մահ տարավ, որից հետո նկարահանեց «Հրաշագործի աշունը» ֆիլմը` նվիրված իտալացի գրող Տոնինո Գուերային: Ֆիլմի հիմքում ընկած է այն գաղափարը, որ արվեստը հակադրվում է մահին ու հաղթում է նրան: Կարծում եմ` սա հրաժեշտի ֆիլմ էր»,- նկատեց բեմադրիչը:

Հեղինակ` Անուշիկ Մելքոնյան