Պտուղբանջարեղենի և խաղողի մթերումներ իրականացնող մի շարք ընկերությունների տրվող վարկերի սուբսիդավորումը կնվազի 3%–ով

ՀԱՍԱՐԱԿՈՒԹՅՈՒՆ 21 Հունիս, 2017 20:05

Գյուղատնտեսության նախարարությունը շրջանառության է դրել մի նախագիծ, որի նպատակով կիրականացնի 2017 թ. պետական բյուջեի վերաբաշխում` 70 միլիոն դրամ կհատկացվի նախարարությանը գյուղատնտեսական հումքի մթերումների նպատակով ագրովերամշակման ոլորտին տրամադրվող վարկերի տոկոսադրույքների մասնակի սուբսիդավորման համար: Վերամշակման նպատակով պտուղբանջարեղենի և խաղողի մթերումներ իրականացնող շուրջ 20 փոքր և միջին իրավաբանական անձանց մոտ 1 միլիարդ 400 միլիոն դրամի չափով 12% տոկոսադրույքով և 1 տարով տրամադրվող վարկերը կսուբսիդավորվեն 9%–ային կետով: Այս մասին տեղեկանում ենք Իրավական ակտերի նախագծերի հրապարակման միասնական կայքից:

Որոշման նախագծում կարդում ենք, որ սուբսիդավորման պիլոտային ծրագրի իրականացման արդյունքում նախադրյալներ կստեղծվեն ոլորտում վարկունակ պահանջարկի մակարդակի բարձրացման համար, ինչը կհանգեցնի գյուղատնտեսական մթերքների գնման դիմաց գյուղացիական տնտեսություններին կատարվող վճարումները կարճ ժամկետներում կատարելուն: Այնուհետև` վերամշակողների և գյուղացիական տնտեսությունների միջև կհաստատվեն բերքի գնման պայմանագրային հարաբերություններ, որը գյուղացիական տնտեսություններին կտա բերքի իրացման կայուն երաշխիքներ: Միաժամանակ 5–7%–ով կբարձրանա ծրագրի շահառու վարկառուների կողմից պտուղբանջարեղենային պահածոների և գինեգործական արտադրանքի մրցունակության մակարդակը, որի արդյունքում կավելանան արտադրության ու արտահանման ծավալները, ինչը դրականորեն կանդրադառնա նոր աշխատատեղերի ստեղծման, ոլորտում զբաղվածների եկամուտների ավելացման և արտաքին ապրանքաշրջանառության բարելավման վրա:

Նախագծում կարդում ենք, որ գյուղատնտեսական մթերքներ վերամշակող արդյունաբերության ձեռնարկությունները վերազինման և շրջանառու միջոցների համալրման կարիքները սեփական ազատ միջոցների սղության կամ բացակայության պատճառով մշտապես ապահովում են վարկային միջոցների հաշվին, որոնք սովորաբար լինում են միջնաժամկետ (3–5 տարի), երբեմն` երկարաժամկետ, դրամով և արտարժույթով, որոնց տոկոսադրույքը դրամով տատանվում է 12,3–ից 14,2, իսկ արտարժույթով՝ 8,8–ից 11,2%–ի սահմաններում:

Ըստ նախագծի` 2015–2016 թթ. պտուղբանջարեղեն վերամշակող շուրջ 35 ընկերությունների և խաղող վերամշակող շուրջ 50 ընկերությունների կողմից գնված 280 հազար և 171 հազար տոննա պտուղբանջարեղենի և խաղողի արժեքը կազմել է համապատասխանաբար 39 և 21 միլիարդ 200 միլիոն դրամ: Այս տարվա հունիսի 6–ի դրությամբ դեռևս չկատարված պարտավորություններ ունեն 10 վերամշակող ընկերություններ՝ 187 միլիոն 600 հազար դրամի չափով:

Ծրագրի հիմնական նպատակը գյուղատնտեսական մթերքներ վերամշակող արդյունաբերության ոլորտում գործող իրավաբանական անձանց տրամադրվող նպատակային վարկերի տոկոսադրույքի մասնակի սուբսիդավորման միջոցով վարկավորման մատչելիության մակարդակի բարձրացումն է: Ծրագրի շրջանակներում տրամադրվող սուբսիդավորման ենթակա վարկերը պետք է նպատակաուղղվեն բացառապես մթերվող խաղողի և պտուղբանջարեղենի արժեքի վճարմանը:

Ծրագիրը նախատեսվում է իրականացնել «ՓՄՁ ներդրումներ» ունիվերսալ վարկային կազմակերպություն ՓԲԸ–ի ռեսուրսների, իսկ սուբսիդավորման գումարը՝ պետական բյուջեից՝ Գյուղատնտեսության նախարարության կողմից իրականացվող ծրագրերից առաջացած խնայողությունների հաշվին:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ