Մի՞թե հերթը հասավ քրիստոնեական ահաբեկչությանը

ՄԻՋԱԶԳԱՅԻՆ 20 Հունիս, 2017 18:08

Երկուշաբթի օրը, Լոնդոնի ոստիկանությունը հայտարարել է, որ քաղաքի հյուսիսում գտնվող Finsbury Park թաղամասում բեռնատարի վարորդը հարձակման զոհ է դարձրել մահմեդականներին, որոնք իրենց համար սրբազան համարվող ռամադան ամսվա արարողությանը մասնակցելուց հետո մզկիթից էին դուրս գալիս: Մզկիթի պատասխանատու Մուհամմեդ Քազբարը միանգամից հայտարարել է, թե «գործողությունն ահաբեկչական է եղել, որովհետև կանխամտածված և նպատակաուղղվված է եղել», ինչպես նաև հաստատել է ոստիկանության տվյալները, ըստ որոնց՝ զոհվել են 4 և վիրավորվել Լոնդոնի 10 մահմեդական քաղաքացիներ: Բրիտանիայի մահմեդական համայնքի ղեկավար Հարուն Խանն էլ հայտարարել է, թե միջադեպը բացառապես իսլամաֆոբիայի, ատելության, թշնամանքի և ռասիզմի լույսի տակ պիտի քննել, որովհետև վերջին շրջանում իրենց համայնքը բազմիցս է ենթարկվել նման դրսևորումների, իսկ գրասենյակն ու առանձին մարդիկ բազում սպառնալից հեռախոսազանգեր են ստացել: Խանն իշխանություններից պահանջել է հատկապես ռամադանի ընթացքում ուժեղացնել մզկիթի ու դրա տարածքի հսկողությունը, ինչին ի պատասխան՝ Լոնդոնի մահմեդական քաղաքապետ Սադիկ խանն է փորձել թուլացնել լարվածությունը: Վերջինս նախ՝ իր ֆեյսբուքյան էջում ցավակցել է զոհերի հարազատներին, ապա շեշտել, որ հարձակման են ենթարկվել Բրիտանիայի քաղաքացիներ, այնուհետ խոստացել է ամեն բան անել ճշմարտությունը վեր հանելու համար և հերթական անգամ հանդարտության կոչ է արել քաղաքացիներին:

Ինչ վերաբերում է ոստիկանությանը՝ այստեղ արդեն հասցրել են ձերբակալել 48–ամյա վարորդին, որն, ըստ որոշ տեղեկությունների, իսկապես էլ վերջին շրջանի ահաբեկչությունների արդյունքում զայրացած քառասունութամյա անգլիացի է: Ամենայն հավանականությամբ՝ նաև քրիստոնյա: Եվ դատելով այն որակումներից, որ տրվում են իշխանությունների կողմից (ոչ մի կողմից չի կարելի պառակտել բրիտանական հանրությունը, չի կարելի ատելություն ու ռասիզմ սերմանել հանրության ներսում և այլն), այս լուրերը, կարծես, կեղծ չեն:

Մի՞թե մենք դեմ հանդիման կանգնեցինք այժմ էլ քրիստոնեական ռադիկալությանը կամ ահաբեկչությանը՝ կարդացի գլխատառերից մեկում:

Սա իսկապես հետաքրքիր թեմա է, որովհետև դատելով մամուլի հրապարակումների ներքևում առկա հանրային մեկնաբանությունների՝ իմ անձնական դիտարկումից, եթե նույնիսկ ասվածը չափազանցություն համարենք, չենք կարող չնկատել, որ ողջ Եվրոպան, վերջին շրջանում վարած միգրացիոն քաղաքականության արդյունքում, կանգնել է փակուղու և, այսպես կոչված, բնիկների ու եկվորների միջև ցանկացած պահին հնարավոր դրամատիկ ընդհարման փաստի առաջ: Եվ խնդիրը միայն Լոնդոնը չէ, թեպետ վերջին շրջանի ահաբեկչություններից հետո այն առավել ցցուն օրինակ է մեզ պատկերանում: Նույն Գերմանիայում էլ չեն հասկանում, թե ինչո՞ւ պիտի կանցլեր Մերկելը քաղաքացիներից վերցրած հարկերով օթևան, սնունդ, աշխատանք, քաղաքացիություն շնորհի, օրինակ, ներգաղթյալ մահմեդականներին, և սրանք էլ ոչ թե յուրացնեն այն արժեքները, որ կրում է երկիրը, այլ մի բան էլ, երախտապարտ լինելու փոխարեն, սպանություններ, ահաբեկչություններ, բռնաբարություններ հեղինակեն, գետոներ ստեղծեն, չինտեգրվեն հանրությանը, սեփական կանոններն ու դրես–կոդերը հաստատեն դպրոցներում, աշխատատեղերում և այլուր:

Ստացվում է՝ ֆաշիզմը կարող է սնունդ առնել ոչ միայն սեփական տեսակից զատ այլ տեսակ չընդունելու, այլև մնացածին չափից դուրս շատ ընդունելու գործելակերպից՝ զգուշացնում են փորձագետները, այս հողի վրա կանխատեսելով նոր և ավելի ողբերգական միջադեպեր, որոնցից, տա Աստված, բոլորը խուսափեն:

Գոհար Սիմոնյան