ՊՊԾ գնդի գրավման հետևանքով զոհված ոստիկանների հիշատակին նվիրված մինի ֆուտբոլի մրցաշար է անցկացվել

«Դինամո» մարզական հասարակական կազմակերպության մարզահամալիրում հունիսի 12-ից 16-ը անցկացվեց մինի ֆուտբոլի հուշամրցաշար՝ նվիրված նախորդ տարվա հուլիսին ՊՊԾ գնդի վրա զինված հարձակման ժամանակ ծառայողական պարտականությունները կատարելիս զոհված ոստիկաններ՝ գնդապետ Արթուր Վանոյանի,  ավագ ենթասպա Գագիկ Մկրտչյանի և լեյտենանտ Յուրի Տեփանոսյանի հիշատակին:

Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից, առաջնությանը մասնակցեցին ոստիկանության տարբեր ստորաբաժանումների 21 հավաքական թիմ: Եզրափակիչում հաղթողի կոչման համար պայքարեցին ոստիկանության զորքերի և Լոռու մարզային վարչության թիմերը: Դիմակայությունն ավարտվեց ոստիկանության զորքերի թիմի հաղթանակով՝ հաշիվը 5:1:

3-րդ տեղը գրավեց ոստիկանության Երևան քաղաքի վարչության ՊՊԾ գնդի թիմը: Հաղթող թիմին հանձնվեցին հուշամրցաշարի փոխանցիկ գավաթը, դիպլոմներ, մեդալներ, նաև դրամական պարգև:

2-րդ և 3-րդ տեղերը գրաված թիմերին էլ հանձնվեց դիպլոմներ ու մեդալներ: Պարգևատրվեցին նաև հուշամրցաշարի լավագույն խաղացողները: Մրցանակները հանձնեցին ոստիկանության պետի առաջին տեղակալ, ոստիկանության գեներալ-լեյտենանտ Հունան Պողոսյանը, ոստիկանության զորքերի հրամանատար, գեներալ-լեյտենանտ Լևոն Երանոսյանը, ոստիկանության պետի տեղակալներ Անուբաղ Համբարյանը, Սամվել Հովհաննիսյանը, Գագիկ Համբարձումյանը, Վարդան Եղիազարյանը, նաև ոստիկանության մարտական և ֆիզիկական պատրաստության բաժնի պետ, Գառնիկ Հայրապետյանը: Պարգևներ հանձնվեցին նաև հուշամրցաշարի պատվավոր հանդիսատեսին՝ Արթուր Վանոյանի, Գագիկ Մկրտչյանի և Յուրի Տեփանոսյանի ընտանիքիների անդամներին: