Մարտունի-Վարդենիկ միջհամայնքային ճանապարհի հիմնանորոգումն ընթացքի մեջ է

 Մարտունի-Վաղաշեն-Աստղաձոր-Զոլաքար-Վարդենիկ 10,5 կիլոմետր երկարության միջհամայնքային ճանապարհի հիմնանորոգման աշխատանքները, որոնց մեկնարկը տրվել էր նախորդ տարվա մայիսին, այս տարի վերսկսվել են ապրիլի կեսերին:
Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանը, կենսական կարեւոր նշանակության այս ճանապարհը, որը սպասարկում է 5 համայնքների ավելի քան 40 հազար բնակչության, հիմնանորոգվում է «Համաշխարհային բանկի» վարկային ծրագրերի միջոցներով: Ճանապարհի հիմնանորոգման նպատակով հատկացվել է 1 միլիարդ 940 միլիոն դրամ, որից 1 միլիարդ 44 միլիոն դրամի ճանապարհաշինական աշխատանք կատարվել է 2016 թվականի ընթացքում: «Ճանապարհաշինարարներն ասֆալտապատել են 6,7 կիլոմետր երկարության ճանապարհ Մարտունի-Վաղաշեն-Աստղաձոր եւ Վարդենիկ-Զոլաքար հատվածներում: Այս տարվա ընթացքում պետք է կատարվի 898 միլիոն դրամի ճանապարհաշինական աշխատանք, ինչի արդյունքում պետք է ասֆալտապատման եւ այլ կարգի աշխատանքներ իրականացվեն Աստղաձոր-Զոլաքար եւ Զոլաքար-Վարդենիկ հատվածներում, որով եւ կամբողջանա ծրագիրը: Ասֆալտապատումը լրիվ ավարտելու համար մնում է 3,8 կիլոմետր, որից 3 կիլոմետրը կազմում է Զոլաքարով անցնող կենտրոնական ճանապարհը: Ասֆալտապատման աշխատանքները կսկսվեն առաջիկա մի քանի օրերի ընթացքում: Դրանց զուգահեռ՝ կընթանան նաեւ հողային, ջրահեռացման համակարգերի եւ մայթերի կառուցման, եզրաքարերի տեղադրման ու այլ կարգի աշխատանքներ: Ճանապարհը շահագործման կհանձնվի այս տարվա սեպտեմբերին»,-պատմեց Գեւորգ Խաչատրյանը: