Ադրբեջանի իշխանությունները Կարմիր խաչի անձնակազմին թույլ չեն տալիս հանդիպել ձերբակալված լրագրողին

Ադրբեջանական իշխանությունները միջազգային Կարմիր խաչ կազմակերպության ներկայացուցիրներին չեն թույլատրում այցելել Ադրբեջանում ձերբակալված լրագրող Աֆղան Մուխտարլըին:

Այս մասին հայտնում է ադրբեջանական azadliq.org-ը:

Ադրբեջանցի իրավապաշտպան Օկթայ Գուլալըևի խոսքով, Բաքվի բանտից Կարմիր խաչի ներկայացուցիչներին  ստել են, թե Մուխտարլըն այնտեղ չէ, որպեսզի հանդիպումը չկայանա:

Իրավապաշտպանի հաղորդմամբ` Մուխտարլըին Կարմիր խաչի ներկայացուցիչներից թաքցնում են, որպեսզի չբացահայտվի լրագրողին խոշտանգումների ենթարկելու հանգամանքները, քանի որ նրա վրա խոշտանգման հետքեր կլինեն:

Աֆղան Մուխտարլին հայտնի է որպես ադրբեջանական իշխանությունների վարած քաղաքականության քննադատ: 2015 թվականից ի վեր ստիպված է եղել բնակություն հաստատել Թբիլիսիում: Օրերս նա անհետացել էր, ինչի կապակցությամբ ընտանիքը դիմել էր ոստիկանություն: Ավելի ուշ նա հայտնվել էր Բաքվում և ձերբակալվել: Նա հայտարարել է, որ Թբիլիսիի կենտրոնից իրեն առևանգել են քաղաքացիական հագուստով անհայտ անձինք, ովքեր խոսում էին վրացերեն: Նրան նստեցրել են մեքենա և դուրս բերել Վրաստանից, ապա դաժան ծեծի են ենթարկել, կապել աչքերը և տեղափոխել մեկ այլ մեքենա, իսկ ադրբեջանական սահմանին կրկին տեղափոխել են երրորդ մեքենա, որում արդեն խոսել են ադրբեջաներեն: Մեքենայում նրա գրպանում խոշոր չափի գումար են դրել, և այժմ Ադրբեջանի իշխանությունները նրան մեղադրում են գումարի ապօրինի տեղափոխման և սահմանը հատելու մեջ:

Լրագրողի փաստաբանն արդեն հանդիպել է նրան և փաստել, որ քթի և ճակատի հատվածում երևում են ծեծի հետքեր, աչքերի տակ կապտուկներ են: Աֆղանն ասել է, որ կրծքավանդակում ուժեղ ցավեր ունի, կարծում է, որ կողի կոտրվածք է ստացել:

Սաբաիլի շրջանային դատարանը Թբիլիսիից առևանգված ադրբեջանցի լրագրող Աֆղան Մուխտարլիի նկատմամբ որպես խափանման միջոց է ընդունել երեք ամսով կալանքը:

Մուխտարլիի առևանգման գործով մտահոգություն են հայտնել Վրաստանի պատկան մարմինները, այդ թվում և երկրի նախագահ Գեորգի Մարգվելաշվիլին: