Լուկաշենկոն կխոսի Պուտինի հետ ռազմաբազայի մասին

Բելառուսի նախագահ Ալեքսանդր Լուկաշենկոն հայտարարել է, որ կքննարկի Ռուսաստանի նախագահ Վլադիմիր Պուտինի հետ Բելառուսում ռուսական ռազմաբազա ստեղծելու հարցը, հաղորդում է korrespondent.net-ը:

«Մենք Վլադիմիր Պուտինի հետ կքննարկենք այդ խնդիրը, եթե Ռուսաստանը մի բան է տեսնում, որ մենք չենք տեսնում, նա կասի»,- ասել է Լուկաշենկոն լրագրողներին:

Նրա խոսքով՝ «եթե ռազմաօդային ուժերի մասին հարցը միանշանակ լինի, ապա տվեք մեզ այդ 24 ինքնաթիռը»: Ընդ որում Լուկաշենկոն հավելել է, որ «եթե չեք ցանկանում տալ, մեզ վարձակալության տվեք»:

Սեպտեմբերի 19-ին Պուտինը հրահանգել է ստորագրել Բելառուսի հետ այդ երկրի տարածքում ռուսական ավիաբազա ստեղծելու մասին համաձայնագիր: Հոկտեմբերի 6-ին Լուկաշենկոն հայտարարել է, որ երկրի տարածքում ռուսական ավիաբազա տեղադրելու մասին խոսք երբեք չի եղել:

Մինսկի 2-րդ օղակային ավտոճանապարհի բացման ժամանակ Բելառուսի նախագահը շփվել է բանվորների և մոտակայքում գտնվող բնակավայրերի բնակիչների հետ և հանգստացրել նրանց. նրանք չպետք է վախենան ռուսական ռազմաբազաներից:

«Մեզ այսօր բազաներ պետք չեն: Առավելևս՝ ռազմաօդային ուժերի»,- հայտարարել է Լուկաշենկոն: «Մեզ պետք են ինքնաթիռներ, այլ ոչ բազաներ»,- ասել է նախագահը: Նրա խոսքով՝ Բելառուսում բավականաչափ լավ օդաչուներ կան և ինտեգրացիոն սահմանների համատեղ հսկողության համար չկան միայն «որոշ տեսակի զինատեսակներ»։

Բելառուսի նախագահը հայտարարել է, որ այդ հարցը նրա հետ ռուսական կողմը չի քննարկել։ Այդ առնչությամբ նրան «զարմացնում և անգամ որոշ չափով վրդովեցնում և վիրավորում է» այն փաստը, որ Ռուսաստանը հենց հիմա է «լրատվամիջոցներում գցել այդ թեման»: «Գուցե, անհանգստանում է, որ մենք իսկապես Արևմուտք ենք գնում»,- ենթադրել է նա։