Ռուսական հարվածներով Սիրիայում նոր սցենար է խաղարկվում

ՄԻՋԱԶԳԱՅԻՆ 1 Հունիս, 2017 16:05

Ռուսաստանի ռազմածովային ուժերի «Ծովակալ Էսսեն» ֆրեգատն ու «Կրասնոդար» սուզանավը Միջերկրական ծովի արևելյան ջրերից «Կալիբր» տեսակի չորս թևավոր հրթիռ են արձակել Պալմիրայի շրջանում տեղակայված ԴԱԻՇ ահաբեկչական խմբավորման օբյեկտների վրա: ՌԴ պաշտպանության նախարարության փոխանցմամբ՝ հարվածի թիրախները ջիհադիստների՝ Պալմիրայից արևելք ընկած հատվածում գտնվող պահուստարաններն են եղել, որտեղ ոչ միայն Ռաքքայից տեղափոխած ծանր զինտեխնիկայի, այլև մարդկային ուժի բավական լուրջ կուտակումներ էին գրանցվել վերջին շրջանում:

Հետաքրքիր է, որ հարվածից առաջ Ռուսաստանն այդ մասին տեղեկացրել է Իսրայելի, ԱՄՆ–ի և Թուրքիայի հրամանատարություններին՝ հաղորդումից անմիջապես հետո կարճ ժամանակամիջոցում իրականացնելով օպերացիան, ինչը փորձագետներին առիթ է տվել մտածելու, թե ռուսները շտապում են Ասադի բանակի հետ միասին, ԱՄՆ–ին մի կողմ թողնելով, և նույնիսկ քրդերից առաջ հասնել Ռաքքա:

Հնարավոր է՝ վերոնշյալ պնդումը փորձագետների երևակայության արդյունքն է, սակայն, հիշյալ վարկածի օգտին է վկայում այն հանգամանքը, որ վերջին շրջանում մեկը մյուսի ետևից հաջողություններ գրանցելով՝ Սիրիայի կառավարական ուժերն իսկապես ավելի ու ավելի հաճախ են սկսել խոսել Ռաքքայի գրավման մասին, հընթացս ազատագրելով ու շրջափակելով դեպի Ռաքքա տանող ճանապարհները:

Բացի այդ, չնայած Ռաքայի ազատագրման նպատակով քրդերին զինելու՝ ԱՄՆ նախագահի մայիսյան որոշմանը, երեկ հայտնի դարձավ, որ ԱՄՆ–ն ռուսական հարվածներից հետո հաշված ժամերի ընթացքում է կազմակերպել սպառազինության մատակարարումը Սիրիայի դեմոկրատական ուժեր կազմավորմանը (SDF), որին Պենտագոնը ԴԱԻՇ–ի դեմ իր հակաահաբեկչական պայքարի հիմնական դաշնակիցներից է համարում:

Նշանակալի է և այն, որ ընդամենը մեկ օր առաջ Deepika news գործակալությունը հղում անելով հետախուզական մարմիններին՝ հաղորդել էր, թե ԱՄՆ–ը չի շտապում Ռաքքայի գրավման առիթով զինել Սիրիայի քրդերին, որովհետև գաղտնի բանակցություններ է վարում ԴԱԻՇ ահաբեկչական խմբավորման պարագլուխների հետ՝ քաղաքից նրանց ապահով դուրսբերման և քրդերի հետ չբախվելու պայմանով: Աղբյուրի հաղորդմամբ՝ այդկերպ ոչ միայն կփոքրանար Ռագգայի ազատագրման սպանվածների թիվը, այլև Թրամփի կառավարությունն այլևս պարտավոր չէր լինի սպառազինել քրդերին՝ արդյունքում զերծ մնալով Թուրքիայի հետ հարաբերությունների հերթական վատթարացման փաստից:

Օղակը լրացնում է ՌԴ պաշտպանության նախարարության այն հայտարարությունը, որ իրենք տեղյակ են եղել ԱՄՆ–ի և ԴԱԻՇ–ի միջև ընթացող բանակցությունների մասին: Եվ ստացվում է՝ ռուսները որոշել են ահաբեկիչներին Ռաքքայից հեռանալու հնարավորություն չտալ՝ ոչ միայն վիժեցնելով բանակցություններն ու Պալմիրայից արևելք հուժկու հարված տալով ջիհադիստներին, այլև ԱՄՆ–ին ստիպելով զինել քրդերին:

Իսկ ի՞նչ են շահում, եթե, միևնույն է, քրդերը ԱՄՆ–ի դաշնակիցն են, բացի այդ, շատ հնարավոր է, Ասադից ավելի շուտ հասնեն Ռաքքա, դա ևս իրենց վերահսկողության տակ առնելով: Հարցը գուցե այլ պատասխաններ էլ ունի, սակայն, մեր կարծիքով, ռուսներն ու Ասադը հույս ունեն, որ Ռոժանայի, այսինքն՝ սիրիական Քուրդիստանի դե յուրե ճանաչումը, հնարավոր է, այդպես էլ գլուխ չեկող գործ լինի իսկ, այ՝ Ռաքքայի հանձնումը կառավարական ուժերին, ինչպես Մանբիջի դեպքում պատահեց, բոլորովին էլ անիրական չի թվում: Ճիշտ է՝ փորձագետներ կան, որոնք պնդում են, թե քրդերը երբեք դրան չեն համաձայնի, և ավելի շուտ արաբ սունիներն էլ նրանց կողմը կանցնեն՝ գերադասելով ապրել Ռաքքայով Ռոժանայում, բայց սա արդեն այլ պատմություն է: Սպասենք՝ տեսնենք, թե իրադարձություններն ինչպես են զարգանում: