Արշակ Զաքարյանի կարծիքով Ֆաթուլաևն է պատվիրում, որ իր հաղորդաշարի վրա ցեխ շպրտեն. «Փաստ»

«Փաստ» օրաթերթը գրում է.

Վավերագրող–ռեժիսոր Արշակ Զաքարյանի «Դիրքերում» հեղինակային հաղորդաշարի շուրջ առաջին անգամ բուռն կրքեր բորբոքվեցին, երբ նկարահանումների ժամանակ հակառակորդի կրակոցներից հրազենային վիրավորում ստացավ հաղորդաշարի օպերատոր Դավիթ Աթոյանը:

Նույնիսկ եղան մարդիկ, ովքեր փորձում էին ապացուցել, թե այդ ամենը կազմակերպվել էր սեփական հաղորդաշարը PR–ելու համար: Դրանից հետո, իհարկե, հաղորդաշարի հեղինակը մամուլի ասուլիսով հանդես եկավ և փորձեց լրագրողների հարցերին սպառիչ պատասխաններ տալ: Բայց, կարծես, դա էլ բավարար չեղավ հաղորդաշարի շուրջ սկսված աղմուկը մեղմելու և խանդի տեսարաններին վերջ դնելու համար:

Ու քանի որ «Դիրքերումը» բանակի մասին պատմող պաշտոնական ու զուսպ հաղորդաշարից բացի, առայժմ միակ, այսպես ասած, ազատ ոճի հաղորդաշարն է, որը հնարավորություն է տալիս մոտիկից ծանոթանալ մեր զինվորների ու սպայական անձնակազմի հետ, սեփական աչքերով տեսնել, թե այնտեղ ինչ ունենք–չունենք և այլն, ուստիև, բնական է, որ ցանկացած առիթի դեպքում լրագրողների բոլոր հարցերն ու համեմատությունները սկսվելու և ավարտվելու են հենց այս հաղորդաշարն օրինակ բերելով:

Մամուլի վերջին անդրադարձը հաղորդաշարի մասին, սակայն, այնպես էր հունից հանել Արշակ Զաքարյանին, որ նա բավականին կոշտ գնահատականներ էր հնչեցրել լրագրողների հասցեին: Ու լավ իմանալով, որ «առանց կրակ ծուխ չի լինում», փորձեցինք հասկանալ, թե այս անգամ ինչն է այդքան վրդովվեցրել հաղորդաշարի հեղինակին:

«Փաստի» հետ զրույցում նա նշեց, որ իրեն ամենաշատը զայրացրել է, որ առանց հստակ փաստեր նշելու գրել են, թե «Դիրքերում» հաղորդաշարը տեղեկություններ է հրապարակում զինվորների թվի, տեղանքի և այլ հարցերի մասին, երևույթը որակելով որպես «տեղեկատվական արտահոսք»:

«Թող որևէ մեկն ապացուցի, որ ես զինվորների քանակի կամ արգելված որևէ ինֆորմացիա եմ հրապարակել: Այս ամեն ինչը նախանձի հետևանք է: Ես առաջարկում եմ, որ ով ցանկություն ունի նման հաղորդաշար նկարելու, թող ինքը գնա գյուլեքի տակ աշխատի: Ո՞վ է իրենց ձեռքը բռնել: Ես համաձայն եմ, թող գան իրենք էս գործը անեն, ես էլ գնամ իմ կինոները նկարեմ»,– ասաց Ա. Զաքարյանը:

Խոսելով վավերագրական ֆիլմաշար նկարելու, հետո արդեն հաղորդաշար ստեղծելու մասին, նա նշեց, որ իր միակ նպատակը բանակի մասին ողբ ու լաց տարածողներին բանակի իրական դեմքը ցույց տալն է եղել:

«Հիշեք, հինգ տարի առաջ բանակի մասին կամ վատն էին գրում, կամ էլ ոչինչ չէին գրում: Նման լուրերի պատճառով եմ ես էս գործը սկսել, որովհետև Հայոց բանակը սխալ էին ներկայացնում: Հիմա էլ արդեն երրորդ անգամ ժողով են անում և մեր հաղորդաշարի մասին խոսում: Իմ կարծիքով Ֆաթուլաևն է պատվերը տալիս այն լրագրողին, ով որ ամեն անգամ նույն հարցերն է բարձրացնում մեր հաղորդաշարի մասին: Ադրբեջանին ձեռք չի տալիս այս հաղորդումը և, ըստ երևույթին, որոշել են հիմա էլ այստեղից փորփրել: Բայց ես ասեմ, որ Պաշտպանության նախարարությունը միշտ նայում է մեր հաղորդաշարը և եթե ուղղումներ անելու կարիք է լինում՝ արվում է: Եվ ես կոչ կանեի, որ լրագրողները փաստերով խոսեն, ոչ թե օդի մեջ»,– ասաց Ա. Զաքարյանը:

Նա նաև նշեց, որ ամենևին էլ չի մեղադրում ՊՆ փոխնախարար Արտակ Զաքարյանին, որ տեսակետ է հայտնել, թե՝ ««Դիրքերում» հաղորդաշարը վերափոխման կարիք ունի»: Նա համոզված է, որ փոխնախարարի այդ պատասխանը պրովոկացիոն հարցի հետևանք է, իսկ արգելված տեղեկություն հրապարակելու դեպքում, իրեն վաղուց կալանավորած կլինեին:

«Հո հանաք մասխարայություն չի՞: Ինչ վերաբերում է մասնագիտական նրբություններին, ապա եթե լրագրողները նոր են սովորում, թե ինչն ինչպես կարելի է ներկայացնել, ես վաղուց եմ նման դասընթաց անցել, նոր եմ սկսել դիրքեր գնալ և նկարահանումներ անել: Բացի այդ, ես բազմիցս ասել եմ, որ ես լրագրող չեմ, այլ վավերագրող եմ և ոչ թե սահմանից նորություններ եմ հայտնում, այլ՝ ներկայացնում եմ այն, ինչ կա: Եվ եթե երկու տարի է Պաշտպանության նախարարությունն ինձ թույլ է տալիս, որ ես առաջնագիծ նկարեմ, ուրեմն ես դրա իրավունքն ունեմ: Ինչ վերաբերում է թույլատրելիության սահմաններին, ապա այդ կանոնները փոփոխական են, և եթե որևէ նորություն է լինում դա էլ ենք անպայման հաշվի առնում»,– ասաց վավերագրող ռեժիսորը:

Դատարկ խոսելու փոխարեն ռեժիսորը խորհուրդ տվեց ուժերը փորձել և նմանատիպ հաղորդաշար սկսել: Իսկ դեմագոգներին էլ խորհուրդ տվեց ավելի լուրջ գործերով զբաղվել: Պաշտպանական կառույցները թիկունքից նկարողներին և նման նկարները հրապարակողներին էլ կոչ արեց «դասեր» տալու փոխարեն իրենց սխալներն ուղղել: Ինչ վերաբերում է առհասարակ սխալներ թույլ չտալուն, ապա, իր խոսքով, եթե դրանք կոպիտ և անթույլատրելի չափերի լինեին, հաղորդաշարը վաղուց փակված կլիներ:

«Ինձ այլ հարց է հետաքրքրում, որի պատասխանը ես չգիտեմ: Ո՞ւմ ոտքն եմ տրորում, ո՞ւմ հացին եմ վայիս եղել, ո՞ւմ ինչով եմ խանգարում, որ ամեն անգամ մեր հաղորդաշարի մասին սխալ տեղեկություններ են տարածում: Եթե կարծում են, որ ես հաղորդաշարի համար ՊՆ–ից գումար եմ ստանում, սխալվում են: Երկու տարի հաղորդաշարն իրականացվել է իմ անձնական միջոցների հաշվին, իսկ արդեն մեկ տարի է «Շանթ» հեռուստաընկերությունն է անշահախնդիր հովանավորում այն, որի համար շատ շնորհակալ եմ իրենցից»,– ասաց Ա. Զաքարյանը:

 Շարունակությունը` «Փաստ» օրաթերթի այսօրվա համարում: