Միհրան Ծառուկյան. «Երգն ունի կոնկրետ հասցեատեր»

Tert.am Life-ը գրում է.

«Հարց չկա». այսպես է կոչվում երգիչ Միհրան Ծառուկյանի նոր երգը, որի հիման վրա նա երեկ տեսահոլովակ է նկարահանել։ Նոր աշխատանքի առաջին մանրամասները  երգիչը վստահել է Tert.am Life–ին։

«Աշխույժ, պարային երգ է, որը նվիրված է երեխաներին։ Առաջին անգամ եմ երեխաներին նվիրված երգ ներկայացնում»,– ասաց երգիչը ու հավելեց, որ  այն պատրաստ կլինի մինչև հունիսի կես։ Երգն ունի կոնկրետ հասցեատեր։ Միհրանից տեղեկացանք, որ այն պատվերով է գրվել։ «Երգի հասցեատերն ինձ արդեն հարազատ դարձած երեխա է»,– նկատեց նա։

«Հարց չկա»–ի երաժշտությունը գրել է Ռիչարդ Մադլենյանը, խոսքերը` Ռիչարդ Մադլենյանն ու Գրիգոր Կյոկչյանը։ Տեսահոլովակի ռեժիսորը Արսեն Երեմյանն է, ոճաբանը` Արմեն Գալյանը։ Տեսահոլովակում նկարահանվել են 1–5 տարեկան երեխաներ։ Փոքրիկների ընտրությամբ Միհրանը չի զբաղվել։

«Ես տեղեկացված չեմ եղել մանրամասներից, ամեն ինչով զբաղվել են Արսենն ու իմ պրոդյուսերը` Մենչը։ Ես նրանց լիովին վստահում եմ։ Իմացել եմ միայն նկարահանման օրն ու թե ես ինչ եմ հագնելու։) Եկա նկարահանման հրապարակ, տեսա շատ երեխաներ կան»,– հայտնեց երգիչն ու հավելեց, որ նկարահանումները կայացել են Ջրվեժի արգելոցում, բնակարանում և տաղավարում

Նկարահանման օրը սկսվել է վաղ առավոտից և ավարտվել հաջորդ առավոտյան։ Չնայած ծանրաբեռնված օրվան` Միհրանը պատմեց, որ դրական լիցքերով օր են ունեցել փոքրիկների հետ. «Երեխաների հետ աշխատելը շատ բարդ էր, բայց շատ հաճելի։ Ռեժիսորն ասում էր` «ռեք», մեկ էլ երեխան սկսում էր լացել կամ ինչ–որ ծիծաղելի բաներ անել։ Մեզ համար հաճելի էր աշխատել երեխաների հետ, բայց Արսենն օրվա վերջում բավականին հոգնած էր»։

Երգիչը գիշերն անցկացրել է նկարահանման հրապարակում։ «Swag Dance–ի փոքրիկ երեխաներն էլ են նկարահանվել տեսահոլովակում, նրանք քնել էին նկարահանման հրապարակում, առավոտյան արթնացան, որ պարեն, ես եկա տուն, որովհետև պետք է մեկնեի»,– ասաց երգիչը, ով կեսօրին մեկնեց Սոչի` մասնակցելու «Արմենիա TV»–ի մրցանակաբաշխությունը։