Ֆուտբոլի Հայաստանի հավաքականը լավ թիմ է. Ջիանի դի Բիազի

Ֆուտբոլի Հայաստանի և Ալբանիայի ազգային հավաքականների մարզիչները նախաղային ասուլիսին խոսել են Եվրո-2016-ի ընտրական փուլի  վերջին խաղում իրենց թիմերի հնարավորությունների մասին: 

Ֆուտբոլի Ալբանիայի ազգային թիմի գլխավոր մարզիչ Ջիաննի դի Բիազի կարծիքով` Հայաստանի հավաքականը լավ թիմ ունի: Այդ տպավորությունը նա ստացել է նաև երկու թիմերի միջև Ալբանիայում կայացած խաղում: «Երբ առաջին խաղում հանդիպեցինք Հայաստանի թիմին, ես շատ տպավորված էի: Տպավորել էր  Հենրիխ Մխիթարյանը, ու հանդիպումից հետո Բեռնար Շալանդին (Հայաստանի հավաքականի նախկին մարզիչը - խմբ.) ասացի, որ Մխիթարյանը շատ հզոր ֆուտբոլիստ է:

Հայաստանի հավաքականը լավ թիմ ունի: Ես շատ անգամ եմ մասնակցել այս տեսակ մրցաշար երի, և հատկապես այնպիսի երկրների համար, ինչպիսիք Ալբանիան ու Հայաստանն են, դրանք շատ կարևոր են: Լիահույս ենք, որ վաղը կհաղթենք ու կուրախացնենք ալբանացիներին: Կարծում եմ՝ մի օր էլ Հայաստանի հավաքականը նման հնարավորություն կունենա»,- լրագրողների հետ հանդիպման ժամանակ նշեց Դի  Բիազին:

Խոսելով այն մասին, թե արդյոք ալբանացիները վստահ են, որ կհաղթեն Հայասանի հավաքականին, նա հավելեց. «Ոչնչում վստահ չենք: Վստահ ենք միայն մեր կարողությունների վրա: Կյանքում միայն մեկ բանում կարող ենք վստահ լինել, որ մի օր գնալու ենք այն աշխարհ: Այս մրցափուլը մեզ համար հրաշքի պես բան էր. պետք օգտվենք այդ ամենից»:

Ֆուտբոլի Հայաստանի ազգային թիմի գլխավոր մարզչի ժամանակավոր պաշտոնակատար Սարգիս Հովսեփյանի կարծիքով` Հայաստանի ազգային թիմը մեծ ցանկություն ունի մրցաշարն ավարտել հաղթանակով:

«Հնարավոր է`  այո: Հասկանում ենք, որ այլևս խնդիրներ չունենք լուծելու: Ընդամենը պետք է վերագտնենք մեր խաղը: Կարող է նաև պարտվենք` նաև լավ խաղալու դեպքում: Սա ֆուտբոլ է. չկա  հավաքական, որ չպարտվի: Ես դա չեմ բացառում: Ոչ ոք մեկ օր առաջ չի կարող ասել, որ իր հավաքականը  անպայման հաղթելու է: Ամեն ինչ անում ենք, որ գեղեցիկ խաղի հետ նաև անպայման հաղթենք վաղը, ինչը ես շատ կարևորում եմ, քանի որ մեր վերջին հանդիպումն է:   Մենք շատ ենք ցանկանում հաղթանակ տոնել սեփական հարկի տակ»,- շեշտեց Հովսեփյանը:

Հավաքականի գլխավոր մարզչի ժամանակավոր պաշտոնակատարն անդրադարձավ նաև Ֆրանսիայի հետ խաղում արած փոփոխություններին` նկատելով. «Շատ կարևոր էր, որ տեսնեինք, թե ունենք ֆուտբոլիստներ, որ երկար ժամանակ գալիս են հավաքական, բայց խաղային փորձ չեն ստանում: Մենք չենք իմանում, թե նման հավաքականների դեմ խաղին որքանով են պատրաստ: Այս ընկերական խաղի երկրորդ կեսում մենք տեսանք, թե որ ֆուտբոլիստը կարող է ավելին անել: Մի բան է խաղալ Հայաստանի առաջնությունում, Հոլանդիայի առաջնության 2-3-րդ դիվիզինում, և այլ բան է խաղալ ազգային հավաքականում:

Դրանք տարբեր մոլորակներ են: Պետք է հասկանանք` ինչպես իրենք իրենց կզգան այդպիսի մրցակիցների դեմ խաղալով: Դա կարևոր է մարզչի համար, որ նա վերլուծություններ անի և հասկանա` որ ֆուտբոլիստը պետք հրավիրվի: Մարզիկներ կային, որ խառնվեցին, մարզիկներ կային, ովքեր պատրաստ էին նման մրցակցի դեմ խաղալ: Բոլորս հասկանում էինք, թե մեր առջև ինչ ֆուտբոլիսներ էին խաղում: Ֆուտբոլիստներ կային, որ տարին նման մեկ հանդիպում են անցկացնում, կան ֆուտբոլիստներ, ովքեր շաբաթը երեք նման հանդիպում են անցկացնում»:

Այն դիտարկմանը, որ ալբանացիներին անպայման հաղթանակ է պետք, Հայաստանի հավաքականին էլ` պատիվը փրկելու համար նույնպես  հաղթանակ է անհրաժեշտ, Հովսեփյանը հակադարձեց. «Եկեք այդպիսի խոսքեր չասենք՝ «պատվի համար». սա սպորտ է: Երբ մի հավաքական, մի մարզիկ պարտվում է, չի նշանակում, որ նրա պատվի հետ ինչ-որ մեկը խաղ է խաղացել:  Բազմաթիվ գործոններ կան: Այդպիսի խոսքեր սպորտի մեջ պետք չէ ասել: Դու կարող ես պարտվել, բայց դա չի նշանակում, որ դու քո պատիվը կորցրել ես: Մենք դուրս ենք գալու մարզադաշտ 100 տոկոսով մրցելու համար, և ամեն ինչ անելու ենք, որ հաղթենք մեր դաշտում:

Եթե առաջին խաղակեսը նայել եք, ապա դուք տեսել եք այդ լավը: Պահերը, որ ստեղծվում էին, հակագրոհները, որ կային` հիանալի էին: Մենք ավելի շատ իրական հնարավորություններ ունեինք, բայց ֆրանսիացիները չունեին այդ հնարավորությունը մինչև  գոլը: Փոփոխություններից հետո ինչ-որ տեղ մակարդակը ընկավ: Առաջին 36 րոպեներին իմ ուզած խաղը տեսա, սակայն սխալներ եղան, որոնցում կա նաև ֆրանսիացի բարձրակարգ խաղացողների գործոնը»: