Life.panorama.am-ը գրում է.
Իրինա Թովմասյանն արդեն շրջանավարտի մայրիկ է: Գեղեցկուհին հուզմունքով ու երջանկությամբ է երեկ դստերը՝ երգչուհի եւ պարուհի Մեգիին, ուղեկցել դպրոց, որտեղ հանդիսավոր միջոցառման ընթացքում չի կարողացել զսպել արցունքները:
Life.panorama.am-ի հետ զրույցում Իրինան պատմեց, որ Վերջին զանգի միջոցառման պարերն ու երգերը բեմադրվել են հենց Մեգիի կողմից.
«Աղջիկս անասելի էներգիա ունի, նա հաճույքով է կազմակերպում դպրոցի հետ կապված բոլոր միջոցառումները, իսկ սպասված Վերջին զանգի պարերն ու երգերը առանձնակի պատասխանատվությամբ էր ընտրել: Հրաշալի միջոցառում էր, որին հետեւում էինք հուզմունքով, բայց նաեւ երջանկությամբ: Ինձ համար մեծ պատիվ էր, երբ տնօրենը խոսեց Մեգիի մասին՝ նշելով, թե նրա հեռանալուց հետո ինչպե՞ս է դպրոցը պատրաստվելու հանդեսներին: Ի դեպ՝ աղջիկս սովորում էր Երեւանի Հ. Պողոսյանի անվան թիվ 82 միջնակարգ դպրոցում, որտեղ սովորել է նաեւ քույրս՝ Լուսին Թովմասյանը: Ես պարզապես չեմ կարող չնշել, որ այս դպրոցի ողջ ուսուցչական կազմը՝ ի դեմս տնօրենի, շատ բարեխիղճ են, մեր դպրոցում երբեւէ չեն եղել գումարներ հավաքելու եւ նման այլ հարցեր, այստեղ շեշտը դրվել է միայն երեխաների ուսման ու անհոգ մանկությունը պահպանելու վրա»,- պատմեց Իրինա Թովմասյանը:
Մեր զրուցակցի խոսքով՝ Մեգին դժվարությամբ է բաժանվել սիրելի դասարանից. «Վերջին զանգից մեկ օր առաջ Մեգին անընդհատ կրկնում էր, թե ինչքան դժվար է գիտակցելը, որ համադասարանցիներից բաժանվելու է: Բայց ես վստահ եմ, որ նրանք միշտ կապը կպահպանեն, քանի որ ընդամենը մեկ 9-րդ դասարան էր, 37 աշակերտ, եւ նրանց մեջ եղած այդ համախմբվածությունն ու միասնությունը այնքան ուժեղ էր, որ հաստատ դա կշարունակվի: Իմիջիայլոց, ես այնքան ուրախ եմ, որ այս դպրոցից եկող ջերմությունը մեր երեխեքին տվել է յուրահատուկ տեսակ: Իմ Մեգին մինչեւ հիմա իջնում է բակ, խաղում ընկերների հետ ու դա այնքան հաճելի է այս դարաշրջանում: Դպրոցական հիշողությունները ամենաբարին ու մաքուրն են, հուսամ՝ հենց այդ հիշողությունները կստիպեն համադասարանցիներով մշտապես պահպանել իրենց ջերմ կապը»,- նկատեց Իրինան:
Խոսելով Մեգիի՝ մասնագիտական ընտրության մասին, գեղեցկուհի մայրիկը նշեց. «Այս պահին մենք դժվար ընտրության առաջ ենք կանգնած: Մեգին դեռ մանկուց սիրել է բեմը, եւ ցանկություն ուներ ընդունվել Երեւանի թատրոնի եւ կինոյի պետական ինստիտուտի «Ռեժիսուրայի» բաժինը, սակայն մեծ սեր ունի նաեւ լեզուների եւ հատկապես ֆրանսերենի նկատմամբ: Այդ իսկ պատճառով էլ հիմա չի կարողանում կողմնորոշվել ընտրի Ֆրանսիական համալսարանի ավագ դպրոցը, որտեղից առավել հեշտությամբ կընդունվի համանուն համալսարան, թե ԵԹԿՊԻ-ին: Ամեն դեպքում, դեռեւս երկու շաբաթ ունի մտածելու համար, թե որ ավագ դպրոցը ընդունվի, որից հետո երեք տարի կունենա՝ վերջնական որոշելու, թե որ ուղղությամբ շարունակի»:
Մեր հարցին, թե Իրինա Թովմասյանը որեւէ կերպ չի՞ ուղղորդում դստերը այս հարցում, պատասխանեց. «Ոչ, ուղղորդել՝ երբեք, բայց խորհուրդներ տալիս եմ: Գիտեք, ես 20 տարեկան էի, երբ ծնվեց Մեգին, մենք միշտ ասես ընկերուհիներ ենք եղել: Այսօր էլ, նրան խորհուրդ եմ տալիս՝ ասելով, որ վատ չի լինի, եթե Ֆրանսիական համալսարան ընդունվի, քանի որ մտքեր ունի արտերկրում և, հատկապես, Ֆրանսիայում եւս ուսանել, բայց նաեւ անմիջապես ասում եմ՝ «Մեգ, ինձ չլսես, ընտրի ինքդ»: Ինձ համար շատ կարեւոր է, որ երեխան երջանկությամբ սովորի, հաճույք ստանա իր ուսման պրոցեսից, իսկ ես այդ հարցում պատրաստ եմ սատար կանգնել նրան: Ես այն ծնողներից եմ, որ երբեք չեմ ափսոսի ուսման վրա գումար ծախսել, մինչեւ նրանք սկսեն աշխատել: Թեեւ Մեգին վաղուց երբեմն-երբեմն աշխատում է, ու դա նրան շատ է կոփել, նա քիչ թե շատ գիտի իր աշխատած գումարի արժեքը, ինչի համար շատ ուրախ եմ: Այդպես ինչքան շուտ հասկանա, թե ինչպես են ծնողները աշխատում այդ գումարը, այնքան ավելի կգնահատի իր ունեցածը»:
Իրին Թովմասյանը վստահեցրեց՝ աղջիկը ինչ մասնագիտություն էլ ընտրի, միեւնույն է, միշտ բեմում է լինելու, քանի որ երգարվեստից ու պարարվեստից չի կարողանա հրաժարվել:
Հեղինակ՝ Անուշիկ Մելքոնյան
