Մարտունու բժշկական կենտրոնի պոլիկլինիկական ծառայությունը տեղափոխվել է ավելի հարմարավետ տարածք

Գեղարքունիքի մարզի Մարտունի քաղաքի բժշկական կենտրոնի պոլիկլինիկական ծառայությունը մայիսի 22-ից իր գործունեությունը կծավալի նույն կենտրոնի մեկ այլ մասնաշենքում՝ շատ ավելի հարմարավետ տարածքում ու բարեկարգ պայմաններում, քանի որ պոլիկլինիկայի հիմնական մասնաշենքը շարունակում է մնալ վթարային ու անբարեկարգ վիճակում : Ինչպես տեղեկացրեց Մարտունու բժշկական կենտրոնի տնօրեն Վարդան Կարապետյանը, բժշկական կենտրոնի պոլիկլինիկական մասնաշենքի հարթ տանիքն արդեն վաղուց կորցրել է շահագործման պիտանիությունը, չի ծառայում իր նպատակին, ինչի հետևանքով էլ ձյան հալոցքի կամ անձրեւների ժամանակ առաջացած կաթոցները քայքայում են պոլիկլինիկական ծառայությունների զբաղեցրած սենյակները, խաթարում բուժսպասարկման բնականոն ընթացքը:

«Պոլիկլինիկական մասնաշենքի հարթ տանիքը գրեթե հիմնովին քայքայվել է, ձյան հալոցքի եւ անձրեւների ջրերն անարգել թափվում են սենյակներն ու միջանցքները: Անհնար էր նման պայմաններում բուժսպասարկում կազմակերպելը, ուստի եւ, մեր քայլը համաձայնեցնելով Գեղարքունիքի մարզպետարանի հետ, որոշեցինք պոլիկլինիկական ծառայությունները շտապ տեղափոխել մեր կենտրոնի մեկ այլ տարածք: Մինչ այդ մեր շենքի երկրորդ հարկի ազատ տարածքում մեր միջոցներով 230 քառակուսի մետր զբաղեցնող 10 սենյակներում եւ միջանցքում իրականացրել ենք հիմնանորոգման աշխատանքներ, որտեղ եւ արդեն տեղավորվել է պոլիկլինիկան: Իսկ պոլիկլինիկայի հիմնական մասնաշենքի տանիքի նորոգումը մնալու է մեզ համար օրախնդիր հարց: Այն պետք է հիմնանորոգվի պետական միջոցների հաշվին»,-իրավիճակը ներկայացրեց բուժհաստատության տնօրենը: Հիմնանորոգված եւ ավելի հարմարավետ սենյակներում են տեղավորվել թերապեւտիկ, մաշկաբանական, սրտաբանական, ներզատաբանական, նյարդաբանական, ակնաբուժական, ուռուցքաբանական եւ էլեկտրասրտագրության կաբինետները, ինչպես նաեւ բժշկական կենտրոնի դեղատունը:

Խոսրով Խլղաթյան