Քարվան կտրող Միհրանը

ՎԵՐԼՈՒԾԱԿԱՆ 22 Մայիս, 2017 10:05

Տարօրինակ բաներ են կատարվում ՀՀ նորընծա Ազգային ժողովում։ Աշխատանքները հազիվ սկսվել են, դեռ մարդիկ սենյակների հարց են լուծում, ոմանք նոր-նոր հարմարվում են ու հանկարծ հայտնվում է ազգով մտահոգ մեկը։ Պարզվում է, այդ մտահոգ մեկը ԴԱՀԿ նախկին պետ Միհրան Պողոսյանն է։ Հիշեցի՞ք, հա էլի, այն նույն Միհրան Պողոսյանը, որ օֆշորներում մի քանի հարյուր միլիոն փող ունի։ Դրա՞մ, չէ ինչ դրամ, դոլլար, մաքուր ու կանաչ։ Պարոն Բենջամին Ֆրանկլինի պատկերով։

Ու հիմա, սույն պարոնը, որն ունի այդ անհայտ կամ ոմանց համար հայտնի ծագման գումարները, հանկարծ որոշել է մտահոգվել ազգիս ծանր ճակատագրով։ Հիշեցնենք, հենց դրա ԴԱՀԿ պետ եղած ժամանակ էր, որ պարտքի գումարի դիմաց բռնագանձում էին անգամ երեխաների տակաշորեր(հիմա էլ ոչինչ չի փոխվել)։ Ու ի՞նչն էր նորընծա պատգամավորին ստիպել մտահոգվել ազգիս ճակատագրով։ Այսպես, նա իր իսկ կուսակից ընկերոջից հետաքրքրվում էր, թե վերջինս ի՞նչ կարծիք ունի այն խայտառակ վիճակի վերաբերյալ, որն այսօր տիրում է բանկային համակարգում, ինչպես նաև վարկավորող կազմակերպություններում։ Այդ հանցնանքների մասին մենք գրել ենք։ Ավելին, հստակ նշել էինք՝ հաղորդում հանցագործության մասին։ Պատկան մարմինները աչք փակեցին աղաղակող փաստերի վրա, գոնե, մինչ այժմ, որևէ հայտարարությամբ հանդես չեն եկել։ Ու հիմա էլ, հայտնվում է Միհրան Պողոսյանը։ Մեկը լինի, հարցնի, Պարոն Պողոսյան, բավականին երկար ժամանակ ԴԱՀԿ պետ էիք, այդ հարցը տալու բազմաթիվ հնարավորություններ ունեիք, տայիք։ Հիմա ի՞նչ եք պոպուլիզմով զբաղվում։
Իսկ ինքներդ Ձեզ հարց տվե՞լ եք, թե նախկինում ղեկավարած Ձեր կառույցում, ինչու՞ էին կրկնապատկում-եռապատկում քաղաքացիների գումարները, մուծած վճարումները ժամանակին չփոխանցելով բանկերին։ Նույն կերպ վարվում են նաև հիմա։ Խնդրեմ, հարցրեք ինքներդ Ձեզ ու տվեք պատասխանը։

Ատոմ Ոսկանյան