Էմանուել Մակրոնն անցկացրել է նոր կառավարության առաջին նիստը

Ֆրանսիայի նախագահ Էմանուել Մակրոնը այսօր՝ մայիսի 18-ին, անցկացրել է նոր կառավարության առաջին նիստը:  Կառավարության անդամների ցանկը հրապարակվել է նախօրեին, որի մեջ մտել են աջ եւ ձախ հոսանքի քաղաքական գործիչներ, կենտրոնամետներ, նաեւ քաղաքացիական հասարակության ներկայացուցիչներ, փոխանցում է RFI-ն:

Չնայած քաղաքական նման բազմազանությանը, նոր կառավարությունը կյանքի կկոչի այն ծրագիրը, որով Էմանուել Մակրոնը նախագահական ընտրությունների է գնացել: Առաջին նիստը նվիրված էր առաջիկա բարեփոխումների «ճանապարհային քարտեզին», հայտնել է կառավարության պաշտոնական ներկայացուցիչ Քրիսթոֆ Քասթաները:

Ինքը Մակրոնը նոր կառավարությանը կոչ է արել պահպանել «բոլոր նախարարների համերաշխությունը»: Իսկ վարչապետ Էդուար Ֆիլիպը, «Հանրապետականներ» աջ կուսակցությունից, հաստատել է, որ ինքը, ինչպես եւ կառավարության մյուս բոլոր անդամները առաջիկա խորհրդարանական ընտրություններում կպայքարեն նախագահական մեծամասնության հասնելու օգտին, այլ ոչ թե «իրենց քաղաքական ընտանիքների օգտին»:

Էմանուել Մակրոնի նոր կառավարությունը, բացի աջ վարչապետից, կազմված է եւս երկու հանրապետական նախարարից, 4 սոցիալիստ նախարարներից, երկու՝ ձախ կենտրոնամետներից: Կառավարության երկրորդ կեսը ձեւավորվել է քաղաքացիական հասարակության ներկայացուցիչներից:

Հասարակական կարծիքի առաջին հարցման արդյունքներով՝ ֆրանսիացիների 61 տոկոսը գոհ է կառավարության կազմից: 65 տոկոսը կարծում է, որ կառավարության նոր կազմը մարմնավորում է «բարենորոգումը»: Եվ միայն 33 տոկոսն է դժգոհ Մակրոնի ընտրած նախարարներից: Այս մասին նշված է BFMTV-ի համար անցկացված Elabe-ի հարցման մեջ: