Արմեն Աշոտյանը գոհ է ընտրություններում ՀՀԿ կուսակցության արդյունքներից

 Նորընտիր խորհրդարանի ՀՀԿ-ական պատգամավոր Արմեն Աշոտյանը գոհ է ընտրությունների արդյունքներից և նոր խորհրդարանի կազմից:

«Ես այսօր հպարտությամբ եմ մուտք գործել Ազգային ժողով որպես ԱԺ պատգամավոր: Գաղտնիք չէ, որ միշտ սիրել եմ Ազգային ժողովը որպես քաղաքական ինստիտուտ: Ես շատ գոհ եմ, որ ընտրվել եմ ԱԺ պատգամավոր, ես շատ գոհ եմ ընտրություններում մեր կուսակցության արդյունքներից, շատ գոհ եմ ԱԺ ընդհանրական կազմից»: Ազգային ժողովում լրագրողների հետ զրույցում ասաց Արմեն Աշոտյանը՝ նշելով, որ քաղաքական վերընթացները դեռ առջևում են, ԱԺ դերակատարությունը երկրում վերագնահատվում է:

«Քաղաքական գործընթացները Հայաստանում պայմանավորված են նախ ներքին զարգացումներով և պատասխան պետք է լինեն արտաքին մարտահրավերներին: Ինչպիսին կլինեն արտաքին և ներքին միջավայրերը, այդպիսին էլ կլինի Ազգային ժողովը: Կարևորն այն է, որ խորհրդարանը շարունակի մնալ հասարակության, սոցիալական, հումանիտար խնդիրների հոգսերի հայելին»,-նշեց նա:

Անդրադառնալով իր՝ ԱԺ փոխխոսնակի պաշտոնում առաջադրվելու խոսակցություններին՝  Արմեն Աշոտյանը պատասխանեց.

«Նմանատիպ հարցադրումները, որոնք փորձում են շահարկել իմ հնարավոր քաղաքական ամբիցիաները, արդեն  ժամկետանց են»:

Խորհրդարանում մեկնարկեց վեցերորդ գումարման Ազգային ժողովի առաջին նիստը: Նիստը վարում է Հայաստանի քրդական համայնքի ղեկավար Կնյազ Հասանովը, ով նորընտիր Խորհրդարանի ամենատարեց պատգամավորն է: Նիստին ներկա էին և ելույթ ունեցան ՀՀ նախագահ Սերժ Սարգսյանն ու Ամենայն  հայոց կաթողիկոս Գարեգին Բ-ն:

Ավելի վաղ Հայաստանի հանրապետական կուսակցության գործադիր մարմնի և խորհրդի նիստերում որոշում էր կայացվել Արմեն Աշոտյանին նշանակել ԱԺ արտաքին հարաբերությունների մշտական հանձնաժողովի նախագահի պաշտոնում: